Nunaqarfinnut angallassinissaq pilersaaruteqarpoq

Ippassaq KNI-ip pisortaa Gerhardt Petersen radioaviisimut oqarpoq ukiortaamiit KNI-ip umiarsuaatileqatigiiffittaassaa Assartuivik aallartippat, nunaqarfinnut assartuinerit inunnillu angallassinerit aallartippata angalanissamut pilersaarutinik takussutissaqanngitsoq; tamanna Assartuiviup pisortaata Nikolaj Ananiassenip akerlilerpaa, oqarluni ukiortaamiit angalanissat tamarmik pilersaaruteqartut:

- Januaarip aallaqaataani Assartuiviup nunaqarfinnut angallasineq tiguppagu angalaffissat tamarmik pilersaaruteqarput. Angalaffissat imarpikkoortaatit tikittarfii naapertorlugit pilersaarusiorpavut, Nikolaj Ananiassen oqarpoq.

Nikolaj Ananiassen oqarpoq assartuutit tikittarfissaat tamarmik ulluni aalajangersimasuni inissinneqarsimasut.

- Sapaatip akunneranut ullut tukiffissat tamarmik pilersaarusiorneqarnikuupput, Nikolaj Ananiassen oqarpoq.

KNI Namminersornerullutik Oqartussanut isunmaqatigiissuteqarpoq ilaasunik assartugassanillu assartuinissamik illoqarfinni Qaqortumi, Arsummi, Nuummi Maniitsumi, Sisimiuni Ummannamilu.

-Isumaqatigiissuteqarfiginngisatsinni assartuinitsinni inuit inissaqarunik ilaasorineqarsinnaasassapput.

Nikolaj Ananiassen oqarpoq assartuinissamik isumaqatigiissuteqarfiginngisaminni aamma pilersaaruteqarlutik:

-Tikiffiissaq ulloq aalajangersimavoq; kisiannili nalunaaqutalerneqarsimanatik. Assartugassat angallammut ikineqareerneratigut aallartartusaassapput.

Nikolaj Ananiassen aperineqarami sooq KNI-ip pisortaa Gerhardt Petersen ippassaq radioavisimut isumaqatigiissuteqarfiginngisaminnik pilersaaruteqannginnerarlutik oqarsimanersoq, akivoq pisortap oqaasiinut naqqiisinnaananilu oqaaseqarsinnaanani.

Nikolaj Ananiassen aamma oqarpoq angalanissamik pilersaaruti KNI-nittartagaani takuneqarsinnaasut.