Nunaqarfinnit illoqarfimmut nutsertoqalersoq

Assigiimmik akeqartitsinerup atorunnaarsikkiartuaartinneqarnerata tunumi kommunip nunaqarfittaani inuuneq pilerinarunnaarsikkiartuaartippaa, taama Ammassallup kommuneata siornamut atatillugu nalunarusiaani naliliisoqarpoq.

Nunaqarfimmiut kommunip illoqarfittaanut Tasiilamut nutsertut amerliartorput, pisorlu kommunalbestyrelsep ajunngitsutut isigaa, taama borgmester Vittus Maaru Mikaelsen aamma kommunaldirektør Laurits Bloch allapput.

-Nunaqarfinnit illoqarfimmut nutsernerup ingerlaavartup sukkatsikkiartuaarnissaa ilimagisariaqarpoq, suliffissaqartitsiniarnermut iluaqutaasussamik. Suliffeqarfinnik pisortanit pigineqartunik aamma imminut akilersinnaasumik aalisakkanik tunisassiorfinnilu kiisalu takornariaqarnermik suliaqarfinni illoqarfimmi naammattunik sulisoqalernikkut, nunaqarfinniiginnarumasut inuuniarnermikkut imminnut napatissinnaasut aamma iluaqusissagai, kommunaldirektør Laurits Bloch radioaviisimut oqarpoq.

Ukiumoortumik nalunaarusiami ajornartorsiutit arlallit taakkartorneqaraluartut isumalluarnartoqarpoq.

Missingersuusiornermi 8,8 millioni koruunit sinneqartoorutissatut naatsorsorneqarsimagaluarput, affaannaappulli 4,2 millioni koruuniugamik.

Sinneqartoorutit ikinnerunerannut pissutaaqataasut ilagaat, atuarfeqarfimmi atorfiit tamangajammik sulisussarsissunneqarsimammata.

Meeqqanik isumaginninnerup aningaasartuutaanerulersimanera aamma pissutaaqataavoq.

- Taakkuli aningaasartuutaapput siumukarnermut tikkuussisut, kommunaldirektør Laurits Bloch oqarpoq.

Kommunip ukiuni tulliuttuni suliassaasa annerit ilagaat Tasiilami illuliortitsinerit.