Nunaqarfinnik pilersuineq oqallissutaajuarsinnarpoq

Nunaqarfiit nioqqutissanik pilersorneqarnerisa oqallisigineqarnerat suli ingerlavoq.
Nioqqutissat ulluinarni pisariaqartinneqartut KNI-p nunaqarfinni isorliunerusunilu niuertarfiini amigaataasarnerat pillugu Naalakkersuisut siulittaasuata Kuupik Kleistip qanoq iliuuseqarnissaa, Siumut siulittaasuanit Aleqa Hammondimit kaammattuutigineqarpoq. Aleqa Hammond avannaanut angalanermini pissutsit tamakkua naammattoorsimavai. KNI-mulli tunngatillugu ulluni qaninnerni susoqarnavianngitsoq Ineqarnermut, Attaveqarnermut Angallannermullu Naalakkersuisoq oqarpoq.

Nioqqutissanik pilersuineq pillugu paragraf 37 naapertorlugu Olga P. Berthelsenip apeqquteqaataannut Naalakkersuisoq Jens B. Frederiksen akissuteqarluni nassuerutigaa, sikunik akornuteqarneq pissutaalluni nunaqarfiit arlaqartut nioqqutissanik pilersorniarneqarnerat ajornarsiutigineqarsimasoq.
Erseqqissaatigaattaaq sila teknikkilu pissutigalugit, nioqqutissanik timissartuussinissamut KNI periarfissaqarsimanngitsoq.

Namminersorlutik Oqartussat KNI-imik kiffartuunneqarnissamik isumaqatigiissutaata aningaasartai ukiormanna 37 millioni koruuniusut Jens B. Frederiksenip eqqaavai.

Aningaasat taakku KNI-p pisiniarfiinik 60-70-inik ingerlataqarnermut, taakku amerlanersaat tapiissutitaqaratik ingerlanneqarnerminni iluanaarutaasinnaannginnerannut sanilliunneqarnissaat, akissuteqaammini aamma oqaatigaa.

- Tamatumuunakkut oqanngilagut KNI-mut piumasaqaateqassanngitsugut, akerlianik Naalakkersuisut ulluinnarni aammalu kiffartuunneqarnissamik isumaqatigiissusiornermi annertuumik piumasaateqartarput, erseqqissaavoq.

Naalakkersuisut akiliutaasa sullinneqarnerullu ataqatigiinnerisa isiginiartuarnissaat naalakkersuisunut pingaaruteqartoq, Ineqarnermut, Attaveqarnermut Angallannermullu NaalakkersuisoqJens B. Frederiksen oqarpoq.

KNI-mik sullissinissamik isumaqatigiissut malillugu KNI-mut tapiissutit 2001-imi 68 millioni koruuniusimallutik 2011-imi 37 millioni koruuninut apparsimapput.

Kiffartuussinissamut isumaqatigiissutip kikkunnut tamanut neqeroorutiginissaa Naalakkersuisuisut maanna isumaliutigigaat, Jens B. Frederiksen aamma oqarpoq.

- Sullissisussat allat pileritsatsinneqarnissaat kissaatigineqarpat, kiffartuunneqarnissamik isumaqatigiissutip isumaginissaanut akiliut qaffanneqartariaqartoq, imaluunniit aamma kiffartuussinissap qaffasissusissaannut piumasaqaatit appartinneqartariaqartut, taamaalillunilu sullissisup nutaap aningaasaliissutigisaasa naapertuuttumik erniortinneqarsinnaanissaat anguneqarsinnaalertariaqartoq naalakkersuisunit naliliisoqartoq, Jens B. Frederiksen akissuteqarpoq.