Nunaqarfinnik matusisoqassappat ajornartorsiuterpassuaqalissaaq

- Nunaqarfiit taamatut oqallisigineqartarnerat annernartaraluarpoq, oqallinnermulli uummarissaataasarpoq, immaqalu nunaqarfimmiut sulinissaannut eqeersaataasarluni, Jenseeraq Hansen oqarpoq.

Nassuerutigaa, nunaqarfimmiut aamma suliffeqartariaqarmata eqqaamaqquaali, illoqarfinnut nuutinneqassagunik, tamanna iluarsisassanik nassataqassammat.

- Suliffissaqartariaqarpugut inissaqartinneqartariaqarlutalu. Isumaqarpunga, illoqarfik ataaserluunniit inunnit taama amerlatigisunit nutserfigineqarnissamut piareersimanngitsoq, Jenseeraq Hansen oqarpoq. Taarsiullugu nunaqarfinni inuussutissarsiutinik ineriartortitsinissaq siunnersuutigaa.

- Takornariaqarneq periarfissaavoq, angallatilli pitsanngorsartariaqarput. Kisianni iluatinnaqaaq, puisinniartitsisinnaavugut aalisartitsisinnaallutalu. Aamma ukiuni kingullerni nannut takussaaleriartortut iluaqutiginiarneqarsinnaapput, Jenseeraq Hansen oqarpoq nassuerutigaluguli, nunaqarfiit ineriartussappata tapiissutit avaqqunneqarsinnaanngitsut.

Ikamiuni aqutsisut siulittaasuat Emil Zeeb aamma isumaqarpoq, nunaqarfiit ataannassagunik tapiissutinik pisariaqartitsiuarallassasut.

- Tamanna qularutissaanngilaq. Aamma illoqarfiit tapiissutisisarput. Taakkualu piorsarneqarsimapput, inuttai oqarfigeqqaarnagit namminneq ingerlassasut. Illoqarfinniikkaanni ilaatigut alersaannaalluni ingerlavissaavoq, tassa aningaasarpassuit tamakkununnga atorneqarsimammata. Emil Zeeb oqarpoq.

Taassumattaaq nunaqarfimmiut illoqarfinnut nutsilissappata tamanna ajornartorsiutinik nassataqassasoq aamma ilimagaa.

- Inuttut ajornartorsiutit uani eqqarsaatigaakka, aammali qularnanngilaq inuuniarnikkut ajornartorsiuteqartorpassuaqalissaaq.