Nunaqarfinni tunisassiorfiit tapiiffigineqarnissaq pisariaqartippaat

Nunaqarfinni tunisassiorfinnut pisortat amerlanerusunik tapiisarnissaat saneqqunneqarsinnaanngilaq. Piniarnermut Nunaqarfinni tunisassiorfiit pillugit suleqatigiissitap piniarnermut aalisarnermullu naalakkersuisuugallartup Finn Karlsenip isumaqatigaa.
Allattoq Elisa Isaksen
maajip 19-at 2009 17:00

Tusagassiutitigut nalunaaruteqarnermini Finn Karlsenip erseqqissarpaa nunaqarfinni amerlasuuni aalisarnermik piniarnermillu inuussutissarsiuteqarnerup avaqqunneqarsinnaannginnera. Suleqatigiissitap nalilerpaa naak nunaqarfinni aalisakkeriviit ingerlannissaasa imminut akilersinnaanngikkaluartut, taamaattoq matusinerit kingunerissagaat inunnut isumaginninnermut aningaasartuuteqarnerulerneq.

Suleqatigiissitat inassutigaat Naalakkersuisunngortussat nunaqarfinni tunisassiorfiit ammatiinnassagaat, taamaammallu 2010 ilanngullugu kiffartuussinissamut isumaqatigiissusiortoqartariaqarnera.

Nunaqarfinni qulingiluani siusinnerusukkut Arctic Green Foodip ingerlatarisimasai, maannakkorpiaq juunip arfernanut kiffartuussinissamut isumaqatigiissuteqarput, Royal Greenlandillu suliffeqarfiutai arfineq marluk matuneqarsimasut, matuneqarnissaminnulluunniit pilersaaruteqarfigineqarsimasut.

Tusagassiutitigut nalunaarummi qanoq aningaasartaqassanersoq eqqaaneqanngilaq, suleqatigiissitammi innersuussutaat eqqortinniarneqartariaqarmata.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq