Nunaqarfinni tunisassiorfiit matuniarpai
Siulersuisuini siulittaasup Peter Grønvold Samuelsenip, nassuerutigaa nunaqarfinni tunisassiorfiit Arctic Green Foodimit tigusatik imminut akilersinnaanngimmata matusariaqassallugit.
- Tigunerini ilaatigut oqaatigineqaraluarpoq suliffeqarfiit pineqartut imminnut nammassinnaasut, kisianni naatsorsuutit takutippaat annertuumik amigartoorutaallutik ingerlanneqartut. Suliffeqarfiit qulit pineqartut ingerlanneqarsinnaanersut siulersuisuni oqaluuserineqassaaq. Siulersuisut ippassaq ataatsimiipput siunnerfissanillu assigiinngitsunik tikkuartuillutik taakkulu januaarip ingerlanerani saqqummiunneqarumaarput, siulersuisuni siulittaasoq taama oqarpoq.
Royal Greenlandip niuernerpalaartumik ingerlatsilernissaa siunertaralugu, nunaqarfinni ingerlatat 1990-ikkut qiteqqunneranni suliffeqarfissuarmit avissaartinneqarput.