Nunaqarfinni siulersuisussat suli inissititerneqanngitsut
Nunaqarfinni 56-iusuni apriilip 26-ianni qinersisoqarnerata kingorna nunaqarfiit 23-it siulersuisussaat suli inissitsiterneqanngillat.
Qinigaasut akuersissutaannik pissarsiniarneq siulersuisussat inissiterniarnerinut kinguarsaataavoq.
Qinigaasinnaatitaanermut ataatsimiititaliap qinigaasut pillagaasimanermut takussutissat allagartaat misissoqqaartussaavai, ataatsimiititaliallu qinigaasunit akuersissutinik piniarnera tassa piffissartuutaavoq.
Nunaqarfinni 23-ini qinikkat ilaasa allagartaat sukumiinerusumik misissugassaasimapput, tamannali nunaqarfinni pineqartuni qinigaasut pillagaasimasuunerinik paasineqassanngitsoq, nunami pissutsit pillugit allaffeqarfimmeersoq Leif Scharling nassuiaavoq.
Atassut nukingisaaraluni qinigaasinnaatitaanermut ataatsimiititaliamut maanna ammasumik allagarpoq. Ataatsimiititaliap tulliani ataatsimiinnissaata aggustimi pisussanngortinneqarsimanera Atassutikkut isoraat, nunaqarfinni siulersuisussat sulilernissaannut kinguarsaataanerarlugu. Tamanna pillugu ataatsimiititaliaq juulip arfineq pingajuanni ataatsimiissasoq Leif Scharling oqarpoq.
Nunaqarfiit 33-it siulersuisussai inissitsiternissaminnut maanna piareeqqapput. Ataatsimiititaliallu ataatsimiinnissamini ilagiit sinniisaannut qinigaasut allagartaat aamma misissorniarpaat.
