Nunaqarfinni najugallit imminornissamik eqqarsaateqarnerusarput
Pissutsit taamaannerat inuiaqatigiinni illoqarfiit nunaqarfiillu akornanni assigiinngisitsisoqarneranik peqquteqarsorineqarpoq.
Imminornissamik eqqarsaateqartarnermik misissuineq nunatta kitaani marloqiusamik ingerlanneqarpoq, tassa 1993-imiit 2005-p 2007-illu tungaanut suliarineqarami.
Nalunaarusiaq naapertorlugu inersimasut nunaqarfinni najugallit 13 procentii ukiuni kingullerni ilumoorullugu imminornissaminnik eqqarsaateqartarsimapput.
Inuusuttuunerusullu tamatuminnga eqqarsaateqarnerusarsimallutik. Nunaqarfinni najugallit imminornissaminnik eqqarsaateqartartut 1993-miit amerleriarujussuarsimasut erseqqissaatigineqarportaaq, ingammillu Kalaallit Nunaata kitaata nunaqarfiini tamanna pinerusarsimavoq.
Nalunaarusiaq naapertorlugu illoqarfiit nunaqarfiillu akornanni assigiinngisitsisoqarnera peqqutaaqataasorineqarpoq, taamatuttaaq inuusuttut nukittuut isumalluutigineqarluartullu nunaqarfinniit illoqarfinnut nuuttarnerat peqqutaaqataasorineqarpoq.
1980-ikkut aallartinneranni Nuuk imminorfiunerpaajusimagaluarpoq, maannali illoqarfissuaq imminorfiunerpaajunani illoqarfiit nunaqarfiillu sinerissamiittut amerlanerpaaffiupput.
Tunumi inuusuttut 15-iniit 29-inut ukiullit imminorsimasut Canadami inuiaqatigiinnut Inunnut sanilliullugit amerlanersaapput, allaallu nunarsuaq tamaat eqqarsaatigalugu imminorfiunerpaasutut nalunaarusiami erseqqissaatigineqarpoq.