Nunaqarfinni mobileqalernissaq kinguarpoq

Ukioq 2005-ip naanissaanut ullut quliinnanngorput, mobiltelefoninillu nunaqarfinni TELE-p atuilersitseqattaarnerani piffissaq atugassaq taamaalilluni naalivippoq.

Taamaakkaluartorli Qaanaap, Upernaviup Tasiilallu nunaqarfiini mobiltelefoni atorlugu juullimut ukiortaassamullu pilluaqqusisoqarsinnaassanngikkallassaaq - attaveqalernissamut atortussanik pisiffigineqarsimasut kinguaattoorsimanerat tamatumunnga pissutaalluni.

Naatsorsuutigineqarpoq nunaqarfinni pineqartuni mobiltelefoninik februaarip naalernerani 2006-imi atuisinnaalernissaq. Atortussallu nutaat teknologimik nutaamik suliaammata oqaluussinermi nipit ersarinnerulernissaannik ilaatigut nassataqassapput. Tassa illoqarfigisami mobiltelefonit marluk akornanni attaveqarnermi qaammataasakkooqqaarnani oqaluussisoqarsinnaasoqalissaaq, tamanna pitsanngoriaataassalluni.

Uummannap pigisaani Ukkusissani aappaagu majip qeqqata missaani mobiltelefonit aatsaat atorsinnaalissapput, illuaraq attaveqaateqarnermut atortuusivik qaqqap qaanut helikopterimik inissinneqarsinnaalerpat.

Atortussat assigiinngitsut tamarmik ikkussuunneqareerpata Kalaallit Nunaanni innuttaasut 90 procentiinit amerlanerit mobiltelefonit atorsinnaalissavaat. Tassalu nunaqarfinni 70-it inorlugit inulinni taamaallaat sms-ertoqarsinnaananilu mobilikkut sianertoqarsinnaassanngilaq.