Nunaqarfinni kommunefogedinngorusuppiit?
Nunatsinni politiit nunaqarfinnut kommunefogedilinnut 35-inut kommunefogedinullu ikiortilinnut Nuummi pikkorissartitseqqammerput. Nunaqarfiilli 17-it suli kommunefogedeqanngillat.
Politimestereqarfiup allaffeqarfiani pisortaq, Claus Lynghom Risbjerg, KNR-mut ilisimatitsivoq kommunefogedissarsiorneq sapaatip akunneri arlaqanngitsut qaangiuppata aallartinneqassasoq.
- Kommunefogedissarsiorneq nuna tamakkerlugu tusagassiutitigut sumiiffiillu aamma aviisiisigut pissaaq, politimestereqarfiup allaffeqarfiata pisortaa erseqqissaavoq.
Nunatta kujataa kommunefogedissaaleqinerpaatut inissisimavoq. Nunaqarfinni aqqanilinni taamaallaat arfineq marluk kommunefogedeqarmata. Alluitsup Paa kujataani inuttunerpaasoq tamatumunnga assersuutissaqqippoq, nunaqarfik 278-nik inoqartoq kommunefogedeqanngimmat.
Danmarkimi inatsisinut atortitsinermut ministeri Morten Bødskov sapaatip akunneri marluk matuma siorna nalunaarpoq kommunefogedit ajoqitut ilinniarsimanngitsutut juulip aallaqqaataanit aningaasarsiaqalissasut.
Ukiumut aningaasarsiaat 75.000 koruuniussallutik nalunaaquttallu akunneri aamma suliffiusimasut aningaasarsiaqaataasassallutik. Taakkulu 7.300 koruuniniit 50.000 koruuninut maannakkut pisartagaannut naleqqiullugit amerlanerungaarput.
