Nunaqarfinni inuusuit internetigissaarnerulissapput
TELE-POSTip aamma aningaasaateqarfiup VILLUM FONDENip isumaqatigiissuteqarnerisigut nunaqarfiit arlaqartut qarasaasiakkut attaveqaatitigut sukkanerusumik ajunnginnerusumillu atuinissamut periarfissaqalissapput.
Suliniut taaguuteqarpoq Nunaqarfinni ilinniartitsinermillu kivitsineq naalisarlugu
"NUIKI".
Suliniummi NUIKI-mi nunaqarfiit Attu aamma Niaqornaarsuk siulliullugit attavilerneqassapput.
TELE-POST suliniummut attaveqaatit aqqutaanik inissamik - båndbreddemik aammalu nunaqarfiit atuarfiini akeqanngitsumik internetersinnaanissaannut tapersiissuteqarpoq. Nunaqarfinnut suliniut misiligutaasumik ukiuni tulliuttuni tallimani ingerlanneqassaaq.
Akeqanngitsumik atuisinnaalernikkut, nunaqarfinni inuusuttut illoqarfinnut ilinniariaqqissimasut attavigilluarneqassapput, tamannalu ilutigalugu aamma nunaqarfiit nutaanik ineriartortitsisinnaanissaat periarfissinneqassalluni.
- Suliffeqarfimmut uatsitut ittumut nunaqarfinni suliniummut peqataanissaq tulluartuuvoq, TELE-POST-imi pisortaanerugallartoq, Steen Montgomery-Andersen oqarpoq.
Inuiaqatigiinnut pingaaruteqarpoq nuna tamakkerlugu inuusuttunik piginnaasaqarluartunik ilinniarsimasunillu peqarnissaaq, paasissutissiinermilu teknologiip nutaaliaasup, ilinniartitsinermi periutsit nutaat nukittorsarsinnaavai, minnerunngitsumik nunaqarfinni. Taamaammat suliniut tapersersorparput, tassanilu misilittagaalersussat, taakkulu tunniussassaat qilanaaralugit, Montgomery-Andersen oqarpoq.
Jens-Jørgen Pedersenip aningaasaateqarfimmi Villum Fonden-imeersup suliniummut peqataanertik nuannaarutigaa. Internet tassaavoq teknologi Kalaallit Nunaannut tulluaqisoq sanaajusorlusooq, Jens-Jørgen Pedersen oqarpoq.
Suliniut politikkerinit tapersersorneqarpoq tikilluaqquneqarlunilu.
Inuussutissarsiornermut Suliffeqarnermullu naalakkersuisoq Ove Karl Berthelsen isumaqarpoq, ukiuni tulliuttuni tallimani suliniummi peqaataanermikkut isumaqatigiissuteqarnikkut inuusuttunut nunaqarfinni najugaqartunut 180-it tikillugit amerlassuseqartunut nutaanik periarfissanik aammaassisuussasoq, Ove Karl Berthelsen oqarpoq.
Suliniut ’NUIKI - nunaqarfinni ilinniartitsinermillu kivitsineq’ ukioq manna siusinnerusukkut VILLUM FONDEN-imit katillugit 16 millioner koruuninik tunisippoq, Namminersorlutillu Oqartussanit 6 millioner koruuninik, ukiuni tallimani nunaqarfinnut 12-inut atorneqartussanik tapiiffigineqarluni.