Nunaqarfinni inissiiviit suli pisariaqarsorineqanngillat

- Paasilluarsinnaavarput nunaqarfinni kommunefogedit suliniarnermikkut ilaatigut artorsartarmata, tamannalu iluarsiiviginiarlugu ilinniartitaanerat akissarsiaqarnerallu pitsanngorsarusuppagut, Politiit allaffissornikkut pisortaat Claus Risbjerg oqarpoq.

- Paasilluarsinnaavarput nunaqarfinni kommunefogedit suliniarnermikkut ilaatigut artorsartarmata aamma atugassaqartitaasamarta toqqissisimananngitsunik. Tamakkualu aaqqiviginiarpagut ilinniartitaanerat aamma akissarsiaqarnerat pitsanngorsarnerisigut, Politiit allaffissornikkut pisortaat Claus Risbjerg Niaqornaarsummi kommunefogedip tigummigallakkanut inissiivissaaleqineq pillugu oqariartuutaanut qisuariaateqarluni taama oqarpoq.

Nunaqarfinni inissiiviusinnaasunik pisariaqartitsisoqarnersoq 1998-mi misissorneqarpoq. Misissuinermi taamani paasineqarpoq, tigummigallakkat  inini inissiivissatut naapertuutinngitsuni inissinneqarallartartut. Misissuinermilu inerniliunneqarpoq nunaqarfinni inissiiviliornissamut pisariaqartitsineq annikitsuaraasoq. Taamatullu Politiit suli isumaqarput.

- Isumaqarpugut ullumikkut pisariaqartitsineq suli annikitsuaraasoq. Ilaannikkulli aamma pisariaqartarpoq kommunefogedip tigummigallakkamik nakkutilliinissaa, taamatut pisoqarnerani kommunefogedi toqqissisimanngippat, taava sulisistsisutut pisussaaffigaarput iliuuseqarfigissallugu, Claus Risbjerg oqarpoq. Nunaqarfinni 45-ni ullumi kommunefogedeqarpoq, 13-inilu kommunefogeqanngilaq imaluunniit kommunefogedimut ikiorteqartoqarani. Kommunefogedit atugaat pillugit piffissami kingullermi oqallittoqarnerata kingunerisaanik Politiit kommunefogedit ilinniartitaasalernissaatigut pitsanngorsaatissanik aaqqissuussipput, tamannalu aasaru piareerneqarumaarpoq.

- Kommunefogedit pitsaanerusunik atugassaqartitaalissapput, aammali tigummigallakkanik nakkutilliisinnaallualernissaat ilinniartitsinikkut anguniassuarput, Claus Risbjerg oqarpoq.