Nunaqarfinni ineriartortitsinissaq pillugu ataatsimeersuartoqalerpoq

Kalaallit Nunaanni najugaqarfinni mikinerni ineriartortitsineq pillugu Ilulissani maajip 23-anniit 25-ata tungaanut ataatsimeersuartitsisoqalerpoq. Kalaallit Nunaanni najugaqarfinnit tamanit peqataasoqassaaq, ataatsimeersuarnermilu ”inuunerinneq” qulequtaralugu oqallittoqartassaaq aamma workshoppertitsinerni siunissami suliniutissat sammineqartassapput.

Ataatsimeersuarnissaq pillugu pilersaarusiami oqallisissiat assigiinngitsut saqqummiunneqartassapput, soorlu ’Kalaallit Nunaanni aningaasaqarneq’, ’inoqarfinnut minnerusunut anguniakkat’, ’inuussutissarsiorfik aamma isumalluutit uumassusillit’, ’isumaginninneq, peqqissuseq aamma avatangiiseq’ aamma ’ilinniartitaaneq aamma suliffeqarfik’. Naalakkersuisut, KANUNUPE aamma KANUKOKA suleqatigiillutik pilersaarusiaq suliaraat.  

Naalakkersuisut kissaatigaat Kalaallit Nunaata ataqatigiissumik ineriartortinneqarnissaa, ineriartortitsinerlu kommunenik aamma nunaqarfinnik qanimut oqaloqateqarnikkut ingerlanneqarusuppoq, Inuussutissarsiornermut Aatsitassanullu Naalakkersuisup Jens-Erik Kirkegaardip ataatsimeersuarnissamik aaqqissuisuuvoq ataatsimeersuarnissamullu peqataasussat naapinnissaat qilanaaraa.

- Naalakkersuisuniit inoqarfinni mikinerusuneersut isorliunerusuneersullu takorluugaat anguniagaallu pillugit tusagaqarnissarput pingaartipparput, nunaqarfimmiut isorliunerusuneersullu atugaat pillugit tusagaqarnissara erinigivara aamma ataatsimeersuarnerup naammassineqarnerani suliniutissatut oqariartuutigineqartussat qilanaarivakka, Inuussutissarsiornermut Aatsitassanullu Naalakkersuisoq Jens-Erik Kirkegaard oqarpoq.