Nunaqarfinni eqqaavinnik aaqqiiniarneq nalornissutaavoq
Eqqaavissuit nunaqarfinniittut iluarsiniarlugit pilersaarut 2024-mi anguneqassasoq, avatangiisinut naalakkersuisup Mala Høy Kúkop oqaatigereerpaa.
- Naluara piviusorpalaarnersoq, neriorsuutaaginnarsinnaappunaasiit. Nunaqarfinnut tunngatillugu neriorsuutit tusartuarlutigit ukiorpaalunngorami, Akunnaami nunaqarfimmik aqutsisoq Gerth Nielsen oqarpoq.
Aamma atuaruk Nunaqarfinni arlalinni ikuallaaveqanngilaq
Eqqaavissuit nunaqarfinniittut 2024-mi pitsaanerulersinniarlugit suliniuteqarlutik, avatangiisinut naalakkersuisoq Mala Høy Kúko Inatsisartunut ilaasortamut Laura Táunâjiup paragraf 37 atorlugu apeqquteqataanut akeqqammerpoq.
Kisianni Gerth Nielsen pilersaarummut nalornivoq. Ikuallaavissarmi Akunnaamiittoq Aasiaat Kommuniugallarmalli toqqammavilerneqarpoq. Noqqaassutigineqartuaraluarlunili suli atulinngilaq.
Aamma atuaruk Avatangiisinut naalakkersuisoq: Eqqaavissuit pitsaanerusumik ingerlanneqarsinnaapput
- Aaqqissuulluarneqartuuppata pitsaanerpaamik suliarineqassagaluarput, taava maani sulisunut kikkunnulluunniit tamanut oqinninngussagaluarluni pilerinarninngorlunilu, Gerth Nielsen oqarpoq.
Namminersorlutik Oqartussat aningaasaliissuteqarnerisigut Qaasuitsup Kommuniani nunaqarfimmini 39-usuni eqqaavinnik torersaaleruttortoq, kommunimi avatangiisinut sulianut aqutsisoq Søren Lindenhann KNR-imut allappoq.
Taakkua saniatigut kommunip eqqakkanut pilersaarutaa naapertorlugu Kangaatsiami, Ikerarsaarsummi Uummannamilu eqqagassat katersuutiinnartut peqqinnissamut ajoqusiisinnaammata taakkunani iliuuseqartariaqarlutik, Lindenhann allappoq.
Aamma atuaruk Utaqqiinnarsinnaajunnaartut: Eqqagassat piiarneqarlik
- Kangaatsiami Ikerasaarsummillu eqqaavissuit maanna torersarpagut, Lindenhann allappoq.
Erseqqissarpaali Uummannami nunaqarfinnilu qanittuaniittuni ikuallaavinnut suli aaqqiissutissarsisimanatik.
Taava aamma Uummannami ikuallaaveqannginneratigut eqqakkanik ikuallaanermi pujoq akuiagaanngitsoq illoqarfiup imeqarfianut qulangiuttarpoq, aammali suli aaqqiissutissarsisimanngillat.
- Tamanna ajornartorsiutaaqaaq, Søren Lindenhann KNR-imut allappoq.
