Nunaqarfinni atuartitaaneq peqqinnissaqarfillu pitsanngorsaaviginiarneqalersaarpoq
Nunaqarfinni meeqqat atuarfiisa pitanngorsaavigineqarnissaat siunniunneqarpoq, soorlu aamma peqqinnissaqarfinni atugassarititat pitsanngorsaaviginiarneqartut.
Kalaallit Nunaanni Nunaqarfiit Peqatigiiffiata KANUNUPE-p siulittaasua Jens Kristian Therkelsenip tamanna nuannaarutigaa:
- Taamaakkaluartoq kisianni uani erseqqissaatigineqarpoq nunaqarfinnik piorsaanissaq aalluterusullugu Naalakkersuisut aamma pingaartikkaat. Taamaammat taama oqariartuutearsimanerat aallaavigissagaanni neriunarpoq aamma taamatut oqariartuuteqarnertik piviusunngortissinnaassagaat, taamaalillunilu aningaasanut inatsisissatut siunnersuut assigiinngitsutigut isumaqatigiinniutaasarmat tassuunakkut isumaqarpunga qaffaasinnaanerat periarfissaqartariaqartoq periarfissaqartullu, KANUNUPE-p siulittaasua Jens Kristian Therkelsen oqarpoq.
Aningaasaqarnermullu Naalakkersuisoq aperigaanni nunaqarfiit isumalluarnissamut pissutissaqarput. Aappaagumut aningaasanut inatsisissatut siunnersuut suli inissinneqanngilaq, nunaqarfinnummi aningaasaliissutissat pillugit kommunit suli ilaatigut aamma isumaqatigiinniarfigineqarmata.
Partiit assigiinngitsut isumaqatigiinniarnissat pillugit aqagu aggersarneqarput, nunaqarfinnut aningaasaliissutissat isumaqatigiinniutigineqassallutik. Aappaagumulli aningaasanut inatsissatut siunnersuut ataatsimut isigalugu isumaqatigiinniarnissat pillugit partiinik aamma oqaloqatiginnittoqassaaq.
- Periarfissat assigiinngitsut kikkunnut tamanut ammaffigaavut, aamma nunaqarfiit, Aningaasaqarnermut Naalakkersuisoq Vittus Qujaukitsoq oqarpoq.
Nunaqarfinnik piorsaasoqarnissaa pillugu aningaasat 14,8 millionit koruunit aappaagumut aningaasanut inatsisissatut siunnersuummi takuneqarsinnaavoq, Vittus Qujaukitsorli KNR-imut ullumi oqaatigaa taakku 24,4 millionit koruuniunissaat Naalakkersuisunit maanna siunnersuutigineqalersaartoq.
Nunaqarfinni peqqinnissaqarfinni sullissinerit pitsanngorsaavigineqarnissaannut aningaasaliisoqarniarpoq, soorlu aamma meeqqat inuusuttullu atuartitaanerisa pitsanngorsaavigineqarnissaat aningaasaliiviginiarneqartoq.
Nunaqarfiit ilinniartitsisussaaleqiffiusut eqqarsaatigalugit, nunaqarfiit imminnut qanittut, atuartoqarniarnermikkullu ikiliartuinnartut tamarmik ilinniartitsisoqanngikkaluarlutik alimasissumik atuartitsisarneq aqqutigalugu imminnut suleqatigiissinnaanerat annerusumik periarfissaq atorniarsarineqarpoq, soorlu aamma nunaqarfinni peqqinnissaqarfinni innuttaasunik sullissineq pitsanngorsaaviginiarneqartoq, Aningaasaqarnermut Naalakkersuisoq Vittus Qujaukitsoq oqarpoq:
- Taavalu peqqinnissaqarfiup tungaatigut Pipalummik taasagarput ungasianit katsorsaanermut taavalu nakorsianut misissuinermut atortorisat aamma ullumikkorniit annertunerusumik atorneqarnissaat peqqinnissaqarfiup iluani takorluukkatta ilagigamikku, Aningaasaqarnermut Naalakkersuisoq Vittus Qujaukitsoq oqarpoq.
Nunaqarfiit pillugit sapaatip-akunnerata naanerani isumasioqatigiittoqarmat inuit 90-it missaat peqataapput, Naalakkersuisunut ilaasortat, Inatsisartunullu ilaasortat assigiinngitsut saniatigut kommuneqarfiit nunaqarfiillu peqataatitsillutik.
