Nunaqarfinni atuarfiit kinguussaapput
Kingumunaasit uppernarsineqarpoq nunaqarfinni atuartut piginnaasaat illoqarfiit atuarfiini atuartut piginnaasaannit appasinnerusut. Taamalu pisoqarpoq naak Kommuneqarfik Sermersooq ilinniartitsisut ilinniarsimasut nunaqarfinni sulilersinniarlugit pilerinarsaasimagaluartoq akissaatit pitsaanerusut inigisamullu akiliut appasinerusoq atorlugit.
Pilerinarsaatitut atorneqartut ilagaat ilinniartitsisut ukiut pingasut nunaqarfimmi sulereernermi bonusisisarnissaat aammalu ukiut tamaasa sulinngiffeqarnermi akiliutsillutik angalasarnissaat.
- Tamakkuli ilinniartitsisunik ilinniarsimasunik amerlanerusunik nunaqarfinni atorfinitsitsinernik maannamut kinguneqanngillat, Kommuneqarfik Sermersooq nittartakkamini allappoq.
Kommuunimi qinikkat immikkut sammisaqartinneqarneranni nunaqarfinni atuartut killiffiat sammineqarpoq. Tassani isumaqatigiissutigineqarpoq nunaqarfinni atuarfiit annertuumik pitsanngorsaavigineqartariaqartut. Taamaammat pitsanngorsaanermi sakkussat anguniagassatut allattorneqarput.
Anguniakkallu tassaapput:
- ukiumi ataatsimi marlunniluunniit atorfinitsitsisarnikkut
- pitsaanerusunik inissaqartitsinikkut
- ilinniartitsisunik avataaniit tikeraarteqartarnikkut
- alimasissumik atuartitsinikkut
- nunaqarfinni atuarfiit pitsaanerusumik nakkutigineqarnerisigut
- kommunit aamma Namminersorlutik Oqartussat akornanni pitsaanerusumik suleqatigiinnikkut
- atuartut illoqarfimmut atuariartunnginneranni pilersaarusiorfigineqarnerisigut, aamma angajoqqaat piffissami aalajangersimasumi illoqarfimmeeqatigitittarnerisigut
- atuartunut angerlarsimaffiit / kollegiat angerlarsimaffippalaarninngortinneqarnerisigut
- atuartut angerlarsimaffiinut siunnersorteqarnikkut
- atuartut angerlarsimaffiini / kollegiani ilinniarsimasunik sulisoqarnikkut
- ilaqutariinnik attaveqaatinik pilersitsiortornikkut
- malittarisassat assigiissaarnerusut, taamaattorli sumiiffimmi periarfissat aallaavigalugit
- akulerutsitsiniarnermut periarfissat pitsanngorsaaviginerisigut
