Nunaqarfinni atuarfiit ingerlanneqarnerat allanngoqqunngilaat
Nunaqarfiit illoqarfinnit allaffissornikkut aqunneqalernissaat nunaqarfiit atuarfiisa aqutsisuinit pitsaasuusorineqanngilaq.
Qeqertarsuartsiaat Atuarfianni pisortaq Ingrid Møller Nathanielsen illoqarfinni atuarfiit nunaqarfinni atuarfinnik perorsaanermik aaqqissuussinermillu aqutsilernissaat pillugu ima oqarpoq.
- Uanga isumaqarpunga ungasianit aqunneqarnissaq takorlooruminaatsillugu, illoqarfimmi atuarfimmik aqutsisut maani pissutsit meeqqallu nalugamikkit.
Aqutsiniartoqalissappat perorsaanikkut allaffissornikkullu aqutsisut maannakulassanngippata allaffissornerujussuaq aqqutigineqaqqaanngippat iluaqutaanissaa takorlooruminaatsippara, Ingrid Møller Nathanielsen oqarpoq.
Ilulissat eqqaanni Oqaatsuni Atuarfiup pisortaa Harald La Cour Akileraartarnermut Atugarissaarnermullu ataatsimiititaliarsuup innersuutaanut aamma eqqumiiginnippoq.
- Nunaqarfimmi atuarfik illoqarfimmit aaqqissuussinikkut aqunneqalissappat, ajornakusoorsinnaavoq tassami atuarfippassuarni perorsaanikkut iluamik aqutsisoqassappat ilinniartitsisut sumiiffimmiittut attaveqarfigineqartariaqassapput. Kommunimit imaluunniit atuarfeqarfimmit anguniakkat sinaakkusiussallu naammassineqartariaqartassammata. Aqutsinermik perorsaanermillu akisussaasoq atuarfimmi ullualunni peqataasariaqartassaaq nunaqarfinnilu angalasariaqartassalluni,
Atuarfiit illoqarfimmit aqunneqalernissaat pitsaasortaqanngilaq. Innersuussut siunissami piviusunngussagaluarpat Oqaatsuni atuarfimmi sulisut napparsimagaangamik Ilulissanut sianertariaqartalissapput aatsaallu illoqarfimminngaanniit ilinniartitsisumik paarlattaasoqassanersoq aalajangerneqartalissalluni, Harald La Cour oqarpoq.
