VIDEO Nunaqarfimmiut tunitsivitsik annertusaavigeqqugaat

- Nipisanniarnerup kingorna saarullinniarneq upernaaq manna aallartinneqarmat karsinut aqqaneq-marlunnut killiliisoqarpoq. Ukiut tamaasa taamatut periaaseqartoqartarnera qasunarpoq, aalisartoq Atammimmiu Vilhelm Poulsen, KNR-imut taama oqarpoq.

Aalisartut kilometerit 200-t (sømilit 100-t missaat) Nuummut angalasariaqartarput. Tamatumalu malitsigisaanik tunisiartornermut ataatsimut orsussamut aningaasartuutigisartagaat 1400 koruunit missaannik amerlanerusarlutik.

Taamaammat Atammimmi tunitsiveqarnikkut periarfissat pitsanngorsaavigineqarnissaat kissaatigineqartupilussuuvoq.

- Ukiut 25-t missaanni peqatigiiffilerivunga, ukiormannalu tunitsiveqarnikkut pissutsit aatsaat taama ilungersunartigitillugit takuakka.

- Pissutsit akuersaarneqarsinnaanngitsut pissutigalugit arlaleriarluta maanngartariaqarsimavugut (Nuuk, aaqq.). Umiatsiaaqqat 6-7-t ullaaralaakkut maanngartarput, Vilhelm Poulsen nassuiaavoq.

Tunitsiveqarnikkut pissutsit ilungersunartut nunaqarfiup aningaasaqarneranut annertuupilussuarmik sunniuteqarput.

- Isertitarineqartartut affaannangajanngorput, tamannalu kommunip akileraarutitigut isertitaatigut malugineqanngitsoornavianngilaq, Vilhelm Poulsen oqarpoq.

Atammimmi tunitsiviup annertusaaffigineqarsinnaanera Royal Greenlandip misissorsimagaluarpaa, akisuallaassasorli KNR-imut oqaatigineqarpoq.