Nunaqarfimmiut nutsernerat piareersimaffiginerusariaqarpoq

Nunaqarfiit inuerukkiartornerannik sukkatsisaanissamik Inuit Ataqatigiit politikkeqanngitsut, Kuupik Kleistip erseqqissaatigaa, ilutigaluguli oqaatigaa sunaluuunnit ammaffigalugu oqaluuserisinnaasariaqartoq.

- Inoqarfiit minnerit ukiorpassuarni ikinnerujartuinnartunik inoqarput, kisianni sukkanerusumik inuerukkiartornissaannik suliniuteqarnissamik eqarsaartersuuteqanngilagut, Inuit Ataqatigiit siulittaasuat, aamma naalakkersuisunut siulittaasuusoq Kuupik Kleist, oqarpoq.

”Namminersortuuneq - suliassarujussuaq ajornanngilarli”, Sulisitsisut Peqatigiffiata taama saqqalimmik nalunaarusioqqammerpoq.

Inuit inoqarfinni ikinnerusuniippata, aningaasarsiornikkut siunissami ungasinnerusumi pissarsissutaanerussasoq nalunaarusiami inerniliussat ilagaat, inoqarfiit ikilippata inuiaqatigiit pigisaat pitsaanersumik atorneqarsinnaasut, oqaatigineqarluni.

Kuupik Kleistilli eqqaasitsissutigaa, nunaqarfiit ukiuni 30-ni kingullerni inuerukkiartorsimasut. Isumaqarporlu, nunaqarfimmiut illoqarfinnut nutsernerisa piareersimaffiginerunissaat pisariaqartoq.

- Naalakkersuisooqatigiit aasaq kingulleq pilersikkatsigilli tamanna suliassatta pingaarnerpaat ilaattut isumaqatigiissutiginikuuarput. Tassalu inuit nutserusaarnerat isiginnaaginnarnagu, inissaqarnikkut suliffissaqarnikkullu piareersimasoqartariaqarnera sulissutigissagipput, Kuupik Kleist oqarpoq.

Sulisitsisut Peqatigiiffiata nalunaarusiaani aamma oqaatigineqarpoq, pisortat aningaasartuutaat akileraarutitigut akitsuutitigullu isertitanit marloriaataasut. Pisortat aningaasartuutaasa affaat ataatsimoortumik tapiissutinit matussuserneqartarput. Tassalu aningaasarsiornikkut namminersortunngussagutta, Nunatta Karsiata akileraarutitigut akitsuutitigullu isertitai amerlisariaqartut, nalunarusiami oqaatigineqarpoq

Akileraartartulli tamarmik assigiimmik qaffaavigineqarnissaat, Naalakkersuisunit siunertarineqanngitsoq, Kuupik Kleist oqarpoq.

- Naliginnaasumik akileraarutinik qaffaanissaq isumaqatiginngilara, agguaassineq alla siunnerfigineqartariaqartoq isumaqarpunga. Naatsorsuutigaara akileraartarneq atugarissaarnerlu pillugit isumalioqatigiissitap inassuteqaammini piginnaaneqarnerit akileraarnerulernissaat ilanngullugu innersuussutigiumaaraa, Kuupik Kleist oqarpoq.