Nunaqarfimmiut meerartaat atuarfimmi angusarlupput
Tassa ataatsimut isigigaanni illoqarfinni atuartut piginnaasaannut naleqqiullugit ajornerit.
Meeqqat atuarfianni atuartut nunaqarfinneersut atuartunit illoqarfinneersunit malunnaatilimmik angusarlunnerupput. Kisitsisit, nunaqarfiit pillugit nalunaarusiameersut, Naalakkersuisullu tusagassiortunik aqagu katersortitsigunik saqqummiussassaat, taama takutitsipput.
Meeqqat Atuarfianni atuartut 2001-imi 2008-milu nalinginnaasumik annertusisamillu misilitsinnermi karakterit agguaqatigiissinneranni, nunaqarfimmiut atuartut karakterii illoqarfimmiut karakteriinit appasinnerupput.
Illoqarfimmiut meerartaasa karakterii agguaqatigiissikkaanni 7,6-iusut nunaqarfinni atuartut karakterii agguaqatigiisikkaanni 7,2-uvoq.
Aammali nunaqarfinni meeqqat, illoqarfinni meeqqanut naleqqiullutik angusarissaarneruffeqarput.
Nunaqafimmiut kalaallisut atuarnermi immaqa tupaallaatissaanngitsumik angusarissaarnerupput. Aammali illoqarfinni atuartunit matematikkimi angusarissaarnerupput. Nunaqarfimmiut meerartaat aamma fysikkimi kemimilu ilaatigut angusarissaarnerupput.
Illoqarfimmiulli meerartaat danskisut tuluttullu atuarnermut pikkorinnerupput.
Aamma atuartut nalinginnaasumik annertusisamilluunniit misilitsinnissamik qinersisarnerat assigiinngeqaat.
Nunaqarfimmiut meerartaasa sisamararterutaannaat annertusisamik misilitsinnissamut sassartartut illoqarfimmiut meerartaasa affaat taamatut misilitsittarput.
Nalunaarusiami allaatigisat naapertorlugit meeqqat nunaqarfinneersut inaarutaasumik misitsinnermik sorlermik qinersinerat, siunissami ineriartoqqinnissamut ajornartorsiutigilerumaagaannut ersiutaapput. Tassami nalinginnaasumik misilitsissimasut ilinniarnissamut qinigassaat killeqarnerusinnaapput.
Karakterit agguaqatigiissinnerisa aamma takutippaat, atuartut nunatta avataani inunngorsimasut nunatsinni inunngorsimasunit angusarissaarnerusartut.
Kisitsisit aamma takutippaat, Tunumi illoqarfinni atuartut ilinniarsimasunik ilinniartitsisussaqarnerpaasut. Tassami atuartut qulingiluaagaangata ilinniarsimasumik ataatsimik ilinniartitsisoqartarpoq.
Taakkutsitaa Qaasuitsup Kommuniani illoqarfinni ajornerpaavoq, atuartut 16-iugaangata ilinniartitsoq ilinniarsimasoq ataasiusarmat.
Nunaqarfiit kisiisa misissoraanni, Kommune Kujallermi nunaqarfiit ilinniarsimasunik ilinniartitsisoqarnerpaapput, Qeqqata Kommuniata nunaqarfiini ilinniartitsisut ilinniarsimasut agguaqatigiissillugit atuartuuteqarnerpaallutik.
Nunaqarfiit pillugit nalunaarusiaq Nordregiop Inuussutissarsiornermut Suliffeqarnermullu Naalakkersuisoqarfik sinnerlugu suliaraa.
Nunaqarfinni atukkat pillugit nalunaarusiornissaq, Inuit Ataqatigiit, Demokraatit Kattusseqatigiit Partiiatalu 2009-miit 2013-mut naalakkersuisooqatigiinissamut isumaqatigiissutaanni ilaavoq.
