Nunaqarfimmiut meerartaasa atuartitaanerat pitsanngorsarneqarli
Ajornartorsiut taanna Tasiilami nunaqarfiinilu atuarfiit pillugit oqallitsitsinermi aamma qaqinneqarpoq. Tappavamini atuarfiit pingasut ilinniartitsisutut atorfinnut allagarsiinerannik kingullermi ataasinnguarluunniit qinnuteqarsimanngilaq. Taarsiullugu ilinniartitsisutut atorfiit ilinniarsimanngitsunik inuttalersorneqarsimapput. Tamannalu meeqqat atuartitaanerisa pitsaassusaanut sunniuteqanngitsoornavianngilaq.
-Nuna tamakkerlugu ilinniartitsisoqarniarneq qiviaraanni, nunaqarfinni ilinniartitsisunik ilinniarsimasunik pissaaleqineq annertoqaaq. Nunaqarfinni atorfinnit 237-iusunit atorfiit 130-t ilinniarsimanngitsunik inuttaqarput, imaappoq 54,9 %-it ilinniarsimanngitsut atorfeqarput. Kisitsit taanna illoqarfinni 19,2%-iuvoq. Assigiinngissullu taanna millisarneqartariaqarpoq, akuerineqarsinnaanngilarmi. Tamanna akisussaaffipput tamakkiuttariaqarparput, Juliane Henningsen IA tunuliaqutaralugu Inatsisartunut qinigassanngortittoq isumaqarpoq.
Inuiaqatigiit kinguaariit aggersut annertuumik pisumasaqaateqarfigissagunikkit, taava aamma pitsaanerpaanik atugassaqartinneqartariaqarput, meeqqallu nunaqarfimmiut taamatut atugassaqartinneqanngillat. Nunaqarfinni atuarfiit arfineq pingasut ullumikkut ilinniarsimasunik ilinniartitsisoqanngillat, tamannalu pissutigalugu illoqarfinni allani atuartunit ajornerungaatsiartumik atugassaqartinneqarlutik.
-Inuit Ataqatigiinnit siunnersuutigaarput meeqqat atuartitaanikkut pisinnaatitaaffii inatsisitigut nukittorsarneqarlutillu ersarissarneqassasut. Meeqqat tamarmik, pitsaasumik ilinniarsimasunillu ilinniartitsisoqarlutik atuartitaasinnaasariaqarput. Siunissami illoqarfinni ilinniartitsisut aamma nunaqarfinni atuartunut akisussaaqataanerusariaqarput. Tamanna kommunit, Inatsisartut/Naalakkersuisut kattuffiillu susassaqartut peqatigalugit aaqqiivigineqartariaqarpoq, siunissami atuarfiit meeqqanut tamanut naligiimmik piginnaanngorsaasoq pilersikkumallugu, Juliane Henningsen nassuiaavoq.
