Nunaqarfimmiut inuusuttortaat imminut toqunnissamik eqqarsaateqartartut

Nunaqarfimmiut inuusuttortaat inuunertik isumassaaruttarpaat, ilarpassuilu illoqarfimmut nuukkaangamik tamanna ilungersuutigisarpaat
Assi © : KNR/Arkiv
februaarip 12-at 2015 08:03
Nutserisoq Simon Uldum -

Nunaqarfimmi najugaqarneq nuannersupilussuuvoq, inoqarfeeqqanili najugallit ilarpassui sumiginnagaanermik atornerlunneqarnermillu aamma aqqusaagaqartarput. Ilinniagaqarnissamut periarfissaqarpallaanngilaq, illoqarfimmullu nuunneq imaannaanngitsuusarpoq unammilligassanillu annertuunik nassataqartarluni.

Tamatuma saniatigut nunaqarfinni ikiortissarsinissamut periarfissat ajornakusoortuupput.

Oqaloqatissaaleqisartut

Vera Wæverip Attumi peroriartornermini tamanna misigisimavaa. Arlaleriarluni imminut toqoriaraluarsimavoq ikiortissarsinissanilu aamma ajornakusoortissimavaa.

- Nunaqarfinni tarnip pissusaanik ilisimasalimmik ataasinnguamilluunniit atorfeqartoqanngilaq. Kikkut tamarmik imminnut ilisarisimasuupput. Nunaqarfinni saaffissaqanngilagut. Assersuuteqalaarlanga. Ukioq Attumiikkama, arlaannut saaffiginnissaguma illoqarfimmi qaninnermi peqqissaavimmut attaveqartariaqarpunga. Taamaammat ikiortissarsinissaq ajornakusoorpoq, Vera Wæver ullumikkut Maniitsumi najugaqartoq tassanilu ikiorneqartoq taama oqaluttuarpoq.

Illoqarfimmut nuunneq imaannaanngitsuuvoq

Innuttaasut nunaqarfimmi peroriartorsimasut qassit imminut toqussimanerinut kisitsisigut paasissutissanik pigisaqartoqanngilaq. Kommune Kujallermili pitsaaliuinermut siunnersorti, Lars Knudsen, oqaluttuarpoq Qaqortumi siorna imminut toquttunit tallimaasunit sisamat nunaqarfinneersuusut.

Kalaallit Nunaanni innuttaasut pillugit misissuinerup takutippaa, imminut toquttartut amerlanersaat naliginnaasumik isorliunerusuneersuusut, aammattaaq atuarneqarsinnaavoq Kitaani nunaqarfinni inuit imminut toqunnissaminnik eqqarsaateqartut amerlassusaat ukiuni kingullerni 20-ni amerleriaateqarsimasut.

Inuunertik isumassaarukkaat

Taamatut inissisimasoqarnera Dorte Vangsø Simonsenip ilisarisinnaanerarpaa.

Taanna Maniitsumi peqqissaavimmi immikkoortortami peqqissaasusut atorfeqarpoq aamma ilaqutariinnik katsorsaasartuulluni.

- Inuusuttorpassuit ulluinnarni inuunerminnik isumassaaruteqqasut naapittarpagut. Siunissamut takorluugaqarneq. Nunaqarfimmi illoqarfimmilu inuusuttut tassuuna assigiinngissuteqarput, Dorte Vangsø Simonsen oqarpoq.

Nunaqarfimmiut inuusuttortaasa allanut imminnullumi atassuteqarniarnikkut ajornartorsiuteqartut aamma tikkuarpaa.

Peroriartorneq imaannaanngitsoq

Aammali imigassamik ikiaroornartumillu atornerluineq ajoqusiisarpoq. Meeqqat angerlarsimaffinni imigassamik ajornartorsiuteqarfimmi peroriartortut ajoquserneqakkajuttarput, attaveqarnissaminnik aammalu ajornartorsiutinik qaangiiniarnissaminnik ajornakusoortitsisarlutik.

- Aanngaajaarniutit meeqqat atugarissaarnissaannut aammalu qanoq nukittutiginissaannut attuumassuteqarluinnarput, tamannalu nunaqarfinni inuusuttut ajornartorsiutiginerugaat takusarparput, Dorte Vangsø Simonsen oqarpoq.