Nunaqarfimmiut illoqarfimmut nutserarnerat pitsaasutut nalilerneqarpoq

aggustip 03-at 2007 10:14

Nunaqarfimmiut illoqarfinnut nutserarnerat Ammassallip Kommuneata ajornartorsiutitut isiginagu pitsaasutut nalilerpaa, illoqarfimmi inuussutissarsiornermut ineriartortitsinermi iluaqutaasinnaasutut nalilerlugu.

Ammassallip Kommuneata ukiumoortumik nalunaarutaani 2006-imoortumi tamanna atuarneqarsinnaavoq.

Ammassallip Kommuneani nunaqarfinneersut Tasiilamut 2006-imi nuussimasut 30-t missaanniipput, ukiuni siuliini aamma tamatuma missaanniittut illoqarfimmut nuussimapput.

Nunaqarfimmiut illoqarfimmut nutserarnerat kommunep pitsaasutut nalilerpaa, inuussutissarsiutinillu ineriartortitsinermut iluaqutaasussatut nalilerlugu taamaaginnarnissaa kissaatigaa.

- Kommunep kissaatigaa, inuuniarnikkut atugassarititaasut pitsaanerpaat malillugit nuttartoqassasoq, inuussutissarsiutitigut inerisarneqarsinnaasut, atuartitaanikkut ilinniartitaanikkullu periarfissat eqqarsaatigalugit. Ukiumoortumik nalunaarummi taama allassimavoq.

Nutserartut malinnaaviginiarlugit inissanik sapinngisamik sanaartortoqassasoq kommunep kissaatigigaa.

Kisitsisit qiviaraanni inissaaleqisut ullumikkut katillugit 176-iupput, utaqqisarnerullu sivisussusaa nikerarpoq, ukiut pingasunit aqqanillit tikillugit utaqqisoqartarmat.

Ukiumoortumik nalunaarummi aamma atuarneqarsinnaavoq, assigiimmik akeqartitsinerup Namminersornerullutik Oqartussanit atorunnaarsikkiartorneqarnerata kingunerisaanik nunaqarfimmiut illoqarfimmut nutseralersimasut. Nutserartut tassaanerarneqarput, nunaqarfimmi pitsaasumik suliffeqanngitsut imaluunnit aningaasatigut pissarsiaqaataalluartumik inuussutissarsiuteqanngitsut.

Taamaattumik nutserartut amerliartornissaat ilimagineqarpoq, tamatumalu kingunerisaanik nunaqarfinni pisortani atorfillit aamma aalisarnermik akilersinnaasumik ingerlatsisut kiisalu piniarnermik takornariaqarnermillu ingerlatsisut nunaqarfimmi kiserngorutissasut.

Tasiilami innuttaasut 7 %-iat suliffissaaleqisuupput.

Ammassallip Kommuneani borgmesterip tullia Andersine Kristiansen oqaaseqartinniaraluaratsigu iluatinngilarput.