Nunaqarfimmiut illoqarfimmut nussorput

Ammassallip Kommuniani innuuttaasut amerlassusaannik missingersuutit naapertorlugit ukiut qulit qaangiuppata Tasiilap illoqarfiani innuttaasut malunnaatilimmik amerleriassapput. Missingersuisimaneq malillugu pisoqassappat, kommunip nunaqarfiini tallimaasuni najugallit ukiut qulit qaangiuppata 995-siinnanngussapput ullumikkut 1.216-inik inoqartut.

Ukiuni qulini tulliuttuni Ammassallup Kommuniani pilersaarut nuttaq malinneqalissaaq. Borgmester Vittus Mikaelsen oqarpoq nunaqarfinni inuussutissarsiorneq pilerinarsartariaqaritsik.

- Ullumikkut ineriartorneq taamatut ingerlaannassapput ajornartorsiutigilissavarput inissaaleqineq. Taamaattoqarnera kommuniminngaanniit eqqumaffiginiarsarivarput. Iliuuserineqarsinnaasunut ilaavoq puisip amia masattunngorlugu tunisassiarineqarsinnaanera. Maani illoqarfimmi nunaqarfiillu ilaanni taamatut tunisassiornerput malunnartumik iluaqutaasimavoq, Kulusumi najugallit innuttai kisimik ikiliartorsimapput. Vittus Mikaelsen oqarpoq nangillunilu: - Qimminut nerukkaatissanik tunisassiorsinnaaneq aamma suliniutigisimavarput, pilersaarusiorlugulu, taamaallaat inatsisitigut aningaasalersuisinnaaneq taanna ajornartorsiutigivarput. Aamma aalisarneq eqqarsaatigalugu misiligaasoqassaaq, Vittus Mikaelsen naggasiivoq.

Pilersaarutit timitalersorneqassappata Naalakkersuisut akuersissuteqaqqaassut, Ammassallip kommuniani borgmesteri Vittus Mikaelsen oqarpoq.