Nunaqarfimmiut eqqunngitsumik pineqartutut misigisimapput
Siulittaasup Jens Kristian Therkildsenip tusagassiuutinut nalunaarummini oqaatigaa, allaanngitsoq inuiaqatigiinni nunaqarfimmiut inuiattut ikinnerussuteqalersimasut, qanorlu atugaqaraluarpata tamanna Naalakkersuisunit soqutigineqanngitsoq.
- Nunaqarfinni sanaartugassat 45 millionit koruuniusut, illoqarfinnut nuunneqarnerat assorsuaq ajuusaarnarpoq, naluneqanngilarmi Nunarput ataatsimut isigalugu nunaqarfinni inissaqarniarneq suli pitsanngorsagassaaqisoq, tamannalu unitsinneqartutut immat peqatigiiffimmiit akuerineqarsinnaanngitsutut isigaarput, Jens Kristian Therkildsen allappoq.
Naalakkersuinikkut sulinermi inuiaqatiguiit tamarmik sullinneqartussaanerat innarlerneqarpoq, tassami nunaqarfimmiut atugarisaat pitsaannginnerulersussaammata.
- Partiit naalakkersuisuutitaqartut Inuit Ataqatigiit aamma Kattusseqatigiit siusinnerusukkut minnerunngitsumillu inatsisartunut qinersineq eqqarsaatigalugu qineqqusaarutaanni nunaqarfinnik illersuineq ersarissoq, soorluuna silaannarmut miloriunneqarsimasoq, imaluunniit Demopkraatinut naalattussiaannanngorsimanerpat? Kanunupe-miit taama aperipput.