Nunaqarfimmiut atuartut tamangajammik inissarsissunneqarput

Kommuneqarfik Upernavimmi kommunalbestyrelsemut ilaasortat nunaqarfiineersut ataatsimiigiaraangamik illu ineqarfigisartagaat meeqqat atuarfianni atuartunut nunaqarfinneersunut utaqqiisaagallartumik inissialiarineqalerpoq. Taamaalillutik atuartut nunaqarfinneersut Upernavimmi ukiaru atuarialertussat 17-it inissaarutivinneqaraluartut tamangajammik maanna inissarsissunneqartut, borgmester Jens Immanuelsen oqarpoq.

- Taamaalillugit tamangajaasa iluarsiivigaavut, marlullu sinneruttut ungasinngitsunnguakkut aaqqiiviginissaat naatsorsuutigaarput. Jens Immanuelsen nassuiaavoq.

Atuartut ineqarfissaat ineqarfioreersup eqqannguaniippoq, ineqarfiullu aappaani errorsiveqarmat igaffeqarlunilu, taakku ineqartunit tamanit atorneqarsinnaassapput. Atuartut marlukkaarlutik ineqartarnissaat aamma pilersaarutaavoq.

Taamali aaqqiigallarneq ataavartutut isigineqassanngitsoq, Inatsisartullu ilinniartitaanermut ataatsimiititaliaanut ippassaq oqariartuutigineqareersutut, nunaqarfinnit atuariartortunut ineqarfimmik nutaamik piaartumik sanatitsinissaq suli anguniarneqartoq borgmesteri erseqqissaavoq.

- Suli pilersaarutaavoq, ineqarfimmik atuartut ataatsimoorlutik ineqarfigisinnaasaannik pilersitsinissaq. Tamannalu pilersaarut attapparput, ukiullu tulliuttut ingerlaneranni aningaasaliisoqarnissaa pisariaqarpoq. Jens Immanuelsen erseqqissaavoq.

Kommunalbestyrelsemulli ilaasortat siunissami ataatsimiigiaraangamik sumi ineqartinneqassanersut oqaaseqarfigiumanngikkallarlugu.