Nunaqarfimmiut aqutsisussaminnik ullumi qinersipput

Kommuninngorlaat sisamaasut nunaqarfinni aqutsisunngortunut akisussaaffinnik tunniussiniarnerat assigiinngissuteqaqaaq. Soorlu Qeqqata Kommuniani nunaqarfiit sapinngisamik nammineertinniarneqarput, soorlu aningaasatigut oqaasissaqartitaassallutik. Kommune Kujallermili qanoq periuseqartoqarnissaa suli aalajangiiffigineqarani.

Nunaqarfiit Peqatigiiffiisa kattuffianni siulittaasup Jens Kristian Therkelsenip, nunaqarfiit ataatsimoorussamik aqutsisoqalernerisigut akisussaaffinnik annerusunik tigusinissaat nuannaarutigaa. Allalli nunaqarfinni aqutsisunngortussanut ernummateqarput. Soorlu nunaqarfiit ilaasa nunaqarfiit aqutsisuini ilaasortaatitaqanngitsoornissartik ernummatigaat.

Nunaqarfinnut aqutsisunik kingullermik 2005-imi qinersisoqarmat aqutsisut 54-it qinigaapput, nunaqarfinnit tamangajanneersut. Ullumikkut qinersinermi aqutsisut nutaat 26-t, pingasuniit tallimanut ilaasortaqartussat qinerneqartussaapput.