Nunaqarfimmiuaqqat peqqinnikkut atugarliornerupput
Illoqarfinni mikinerni nunaqarfinnilu peqqinnissamik siammarsaanermut aningaasaliisutit amigartut, Birgit Niclasen misissuinermini inerniniliivoq
Meeqqat sisamanik ukioqalerneranni atualernermillu nalaani misissortittarsimanngitsut, misissuinermi ilaatigut paasineqarpoq. Maleruagassat atuuttut malillugit misissortinnerit tamakku meeqqanut tamanut neqeroorutigineqartussaagaluarput.
Taamaalillunilu Peqqinnissaqarfik meeqqat peqqissunissamut periarfissaasa assigiinnginnerannut pisooqataavoq, illoqarfinni mikinerni nunaqarinnilu meeqqat eqqugaallutik.
Illoqarfinni angisuuni nunaqarfinnilu isertitat assigiingeqisut qulaajarneqareernikuuvoq, illoqarfimmiut inooqataanikkut atugarissaanikkullu atugaat nunaqarfimmiunit pitsaaneroqalutik.
Birgit Niclasenip misissuinermi qulaajarpaa, illoqarfinni minneri nunaqarfinnilu meeqqat nerisasssaalatseqqajaasartut kigullunerusullu. Aamma illoqarfinni meeqqat peqqinnartunik paarnartukulanerusut, nunaqarfimmiut meerartaat tungusunnittortukulallutillu sodavanditukulanerupput, aammalu pujortaliaarnerusarlutik.
Birgit Niclasen nangilluni allappoq, inuuniarnikkut atukkanik pissuteqartumik meeqqat peqqissutsikkut assigiingissutaat, Peqqinnissaqarfimmik ilaatiguinnaq nalimmassarneqartartut. Tassalu Peqqinnissaqarfik iliuuserisartakkamigut peqqissutsikkut assigiinngisitsinermut ilasaataasoq, ilisimatooq allappoq.
Nanette Olsen Jeremiassen Kangaatsiami peqqisaasut marluusut aapparaat, taassumalu illoqarfinni minnerni nunaqarfinnilu peqqissutsimik siammarsaaneq ajornakusuooqisoq oqaatigaa. Meeqqat sisamanik ukioqalerneranni atualernermillu nalaani misissortittarsimannginnerat tamakkununnga ilaallutik.
Tamanna Peqqinnissaqarfiup aningaaakinneranik sulisussakinnermillu peqquteqartoq, Nanette Olsen Jeremiassen oqarpoq.
- Ajornartorsiutit assigiingitsunik peqquteqarput. Suliassat tamaasa naammassiniassagutsigit, Peqqinnissaqarfik amerlanerusunik aningaasaliiffigineqartariaqarpoq. Imaanngilarmi peqqinnissamik siammarsaaneq pingaruteqanngitsoq. Naamik, immaqa pingarnerpaavoq. Kisianni suliassap naammassinissaanut periarfissaqanngilagut, Nanette Olsen Jeremiassen oqarpoq.
Taassuma erseqissarpaa, peqqissutsimik siammarsaaneq Peqqinnissaqarfiup kisimiilluni suliassarinngikkaa, tamanulli akisusaaaffiusoq. Aperaarlu ilumut inoqarfiit avinngarusimasut taamannak atugaqartillugit ataatinneqarsinnaanersut?
- Meeraq ineriartornissaanut ikiussagaasoq oqaluuseraarput. Tassalu peqqinnartunik nerisassaqarnissaa ilaavoq. Kisianni peqqinnartunik piniarfimmi nerisassarsisinaanngikkaanni pilersuisuusullu suliffissaqanngippata, tamanna ajornakusooqaaq. Tassami Kangaatsiami tunisassiorfik matoqqqammat, suliffissaaleqisoqaqaaq aalisartullu uninngallutik, Nanette Olsen jeremiassen oqarpoq.
