Nunatsinni innuttaasut amerlanerpaartaat internet aqqutigalugu toqqaannartumik ilinniarsinnaanissaannut teknikkikkut ullumikkut periarfissaavoq.Assi: Tele-Post

Nunaqarfimmit ilinniartitsisunngorniarit: Internetti ilinniartitsinermut atorneqarsinnaalluarpoq – Tunumili ajornarluni

Nunatta ilarujussua internettimut atassuteqarluarmat, Ilinniakkamik internettukkut ingerlatsisoqarsinnaasoq, qarasaasialerinermik immikkut ilisimasallit naliliipput.

Isumaginninnermut siunnersortinngornissaq upperisarsiornermilluunniit ilisimatusarfimmi ilinniarnissaq takorluugarigukku nunaqarfimmilu angerlarsimaannarusullutik taava takorluukkat immaqa piviusunngorsinnaassaaq.

Teknikkikkummi ullutsinni atortorissaarutit nunatsinni innuttaasunut amerlanersaanut internettikkut ilinniarnissamik periarfissaqartitsipput.

Qarasaasialerinermillu Nuummi suliffeqarfimmik Comby A/S-imik piginneqataasoq, tassanilu teknikkeqarnermut pisortaq, Michael Collin taama oqarpoq.

- Nunatta kitaata sineriaani tamarmi avataanit assitalerlugu nipitalerlugulu ilinniarnermut malinnaanissamut pisariaqartumik sukkassusilimmik attaveqaateqarpoq.

Tamanna sumiiffinni immap naqqatigut kabelikkut radiukkulu sakkortusaavitigut atassuteqartunut atuuttoq ilanngullugu oqaatigaa.

AAMMA ATUARUK Kim Kielsen qineqqusaaruteqartoq: Nunaqarfinni inuusuttut internet atorlugu ilinniassasut

Taamaalilluni teknikkikkut atortorissaarutit Siumup siulittaasuata, Kim Kielsenip, siunnersuutaa piviusunngortissinnaavaat. Siumumi sapaatip-akunnerata tulliani siulittaasussamik taasisoqarpat, taassuma politikkimi siunissaa aalajangiiffigineqassaaq.

Kielsenip innuttaasut amerlanerusut pingaartumik nunaqarfinneersut avataanit ilinniagaqartariaqarsorai.

Ilinniarnertuunngorniarfinni ilinniakkat ilinniarfiillu ingerlaqqiffiusut pineqarput. Nunaqarfinniit amerlanerusut ilinniarsinnaappata, aamma amerlanerusut nunaqarfinnut nuussinnaassasut, Kim Kielsen isumaqarpoq.

Innuttaasunik 2018-imi misissuinermi nunaqarfimmiut 79 procentii ilinniagaqanngitsut takutinneqarpoq.

Tunumut attaveqaatit kipiluttunartut

Teknikkikkulli periarfissat suli killeqartut, Michael Collinip Comby A/S-imeersup erseqqissaatigaa.

Nunatsinni ilinniartitaanerup qaffasissusaa

Nunaqarfinni illoqarfinnilu 2017/2018-imi ilinniarsimasut ilinniarsimanngitsullu amerlassusaat

Nunaqarfinni:
79 procentit ilinniagaqanngillat.
17 procentit ingerlaqqiffiusunik sivikinnerusunik ilinniagaqarput.
3,8 procentit ingerlaqqiffiusunik akunnattumik sivisussusilinnik ilinniagaqarput.

Illoqarfiit (Nuuk minillugu): 

53 procentit ilinniagaqanngillat.
35 procentit ingerlaqqiffiusunik sivikinnerusunik ilinniagaqarput.
13 procentit ingerlaqqiffiusunik akunnattumik sivisussusilinnik ilinniagaqarput.

Nuuk: 
32 procentit ilinniagaqanngillat.
37 procentit ingerlaqqiffiusunik sivikinnerusunik ilinniagaqarput.
32 procentit ingerlaqqiffiusunik akunnattumik sivisussusilinnik ilinniagaqarput.

Paasissutissarsiffik: Nunatsinni innuttaasunik misissuineq 2018, SDU

Siullertut, Tunumi tamarmi nunattalu kitaata avannarpasinnerpaartaani internettimut aqqutit tamarmik qaammataasatigut suli atassuteqarput.

- Upernavimmiit avannarpasinnerulaartumi qaammataasatigut attaveqaatit atulertarput, taamaalillunilu attaveqaatit ilinniartitsinermut toqqaannartumik malinnaanissamut ajornerussallutik, Michael Collin oqarpoq.

Taannalu qarasaasialerinermik siunnersortimit, qarasaasialerisartunit Nukit-it-meersumit, Dan Brøndenimit taperserneqarpoq.

- Avataanit ilinniarnermik aallartitsinissaq illoqarfinni qaammataasatigut attaveqaateqarfiusuniittunut ullumikkut kaammattuutigerusunngilara, taanna KNR-imut oqarpoq.

Radiukkut sakkortusaaviit kitaata sineriaata ilajurussuanut atassuteqarluartitsigaluartut nunatta avannarpasissortaani illoqarfiit imminnut ungasimmata radiukkut sakkortusaaviisigut attaveqarneq suli ajornartorsiutaavoq.

Taamaakkaluartorli neriuutissaqarpoq, aamma Tunup sineriaani ilinniarnissamik takorluugaqartunut.

Tele Greenlandip internettimut attaviit kitaata sineriaani qaammataasatigut maanna attaveqaateqarfiusuni internettimut attaveqaatinik 2023-mut pitsanngorsaaniarluni ukioq manna januaarimi nalunaarutigaa.

Tasiilami nunami tigooqqaavik ukioq manna nutartissaaq, Ittoqqortoormiini 2021-mi taamaattoqassalluni Qaanaamilu Pituffiullu eqqaani attaveqaatit 2023-mi pitsanngorsassallutik.

Aamma aatsitassarsiorfinnut savaatilinnullu.

Ilinniartunut ilinniartitsisunullu piumasaqaatit

Internettikkulli pitsaasumik attaveqaateqarnissaq ullumikkut unammillernartut minnersaraat. Unammillernartua annerpaaq ilinniartumiillunilu ilinniartitsisumiittoq, Michael Collin oqarpoq.

AAMMA ATUARUK Siumut novembarip naalernerani ataatsimeersualerpoq

- Piumassuseqarniarnissaq unammillernartuuvoq, ilinniartitsinerup kingorna ilinniagassitsikkaanni taakku kisimiilluni suliarineqartussaapput, taanna oqarpoq.

Kingullertullu minnerunngitsumillu, internettikkut atuartitsinineq ilinniarfeqarfinnut suliassarujussuusoq, qarasaasialerisartunit Nukit.it-meersoq Dan Brønden oqarpoq.

- Ilinniartitsisut allatut eqqarsarnissaat internettikkullu ilinniartitsinissamut piareersarnissaat pisariaqarluinnarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat