Nunaqarfimmi tuberkulose: Arfinilinnik ukiulik tunillanneqarsimasoq

Nunatsinni tuberkulose suli ajornartorsiutaavoq. Niaqornaarsummi sakialluut pillugu sapaatip akunnerani uani ataatsimiisitsisoqarpoq.
Niaqornaarsummi arfinilinnik ukiulik Kunuunnguaq Petersen tunillanneqarsimasunut ilaavoq. Assi © : Privat
maajip 28-at 2020 11:39

- Aap, Niaqornaarsummi sakialluttunik nassaartoqarpoq,

Nunatta nakorsaaneqarfiani nakorsaq Paneeraq Noahsen oqarpoq.

Niaqornaarsummi tunillatsissimasut arlaqartut, Paneeraq Noahsen oqarpoq. Qanorli amerlatigineri oqaatigisinnaanngilai.

Niaqornaarsummi arfinilinnik ukiulik Kunuunnguaq Petersen tunillanneqarsimasunut ilaavoq.

- Soorunami tupannarpoq, Rebekka Petersen, Kunuunnguaq Petersenip arnaa oqarpoq.

- Suli ajornartorsiutaavoq

Tuberkulose nappaataavoq tuniluuttoq, 80-ikkut qiteqqunneranniit 2010-ip tungaanut atuagaaleriartortoq.

Nunatsinni tuberkulose:

Tuberkulose nappaataavoq tuberkelbakteriamik taaneqartumik peqquteqartumik tuniluuttartoq. Nappaat antibiotikanik assigiinngitsunik katsorsarneqarsinnaavoq.

Tuberkulose ukiorpassuarni nakkutigineqarsinnaasimavoq, ukiunili qulini kingullerni tunillatsittartut amerliartoqqilersimapput.

Tuberkulosernermi ersiutit: kissarneqarneq, unnuakkut aallertarneq, nerisassanik illigisaqannginneq, sanigorneq qasoqqanerlu.

Puatsigut tuberkuloseqaraanni quersortarneq aamma qaqortuusinnaasumik, sungaarujullunilu qorsorpaluttuusinnaasumik aagasaartumilluunniit qiseqarneq nalinginnaapput

Najoqqutaq: Peqqik.gl

2010-mi amerlanerpaagamik 115-inik ilapput taamaalillutillu innuttaasut 100.000-iuppata 205-it missaat tunillatsissimassallutik.

2018-imi 49-it sakialluummit tunillanneqarsimasut uppernarsineqarpoq.

Nunanut allanut sanilliussigaanni nunatsinni sakialluutilippassusut, Paneeraq Noahsen oqarpoq.

- Pitsanngoriartornikuuvoq. Ukiuni kingullerni. 50-ikkut eqqarsaatigalugit qaffasinnerujussuunikuuvoq. Kisianni suli nunatsinni ajornartorsiutaavoq, suli akiorniagassaavoq, nakorsaq oqarpoq.

Tuberkulosemut pitsaaliuisoqarpoq. Assersuutigalugu peqqinnissaqarfik Niaqarnaarsummi innuttaasunut maajip 25-iani ataatsimiisitsivoq.

Tuberkulose katsorsarneqarsinnasoq

Naak Rebekka Petersen ernini tunillatsissimasoq paasigamiuk tupakkaluarluni eqqissisimavoq.

- Ilitsersuulluarneqariaratta paasigatsigulu nakorsarneqarsinnaasoq eqqissiallaqaagut, Rebekka oqarpoq.

Nakorsaq Aasianneersoq maajip aallartilaarnerani Niaqornaarsummiippoq, tassanilu ilaqutariit paasivaat ernertik tuberkulosemik tunillatsissimasoq.

AAMMA ATUARUK Kampen mod tuberkulose kræver fælles indsats

Tassami Rebekkap erni unnuami sinnarluttartoq malugisimavaa. Sinnarlunneq tuberkulosemut ersiutit ilagaat.

- Pitsanngoriartutut malunnarpoq, kisianni suli sinnarluttarluni, Rebekka oqarpoq.

Niaqornaarsummiut ernumassappat?

- Naamik, una sakialluut nakorsaasersorneqarsinnaavoq. Kisianni soorunami imminut illersortoqarsinnaavoq soorlu coronamit tusartuartakkagut; qanillinaveersaarluta taavalu eqqiluisaarneq atorlugu imminut illersorsinnaavugut, nakorsaq Paneeraq Noahsen oqarpoq.