Nunaqarfimmi atuarfiup pisortaa: Atuarfinni pisortat nunaqarfinni pissutsit naluaat

Atuarfik pillugu Inatsisartut inatsisissaattut Naalakkersuisut siunnersuutaanni  tamanna anguniarneqaraluartoq - siunnersuullu pitsaasutut nalilerneqaraluartoq,  Nuugaatsiami atuarfiup pisortaanit Barbara Strøm-Barisimit apeqquserneqarpoq:

- Illoqarfinni atuarfinni pisortat amerlasuut nunaqarfinni pissutsinik atuuttunik ilisimasaqarneq ajorput. Piffissat suliffiusut perorsaanermullu tunngasut ilisimasaqarfigineq ajorpaat.

- Politikkikkummi anguniakkat nunaqarfiit ilaanni malinneqartuaannanngillat. Ilinniartitsisulli nunaqarfinniittut, soorlu maani Nuugaatsiami, qaqugukkulluunniit naapinneqarsinnaasarput, atuartullu ilikkagassatik ilikkartarpaat, Nuugaatsiami atuarfiup pisortaa Barbara Strøm-Baris KNR-imut oqarpoq.

Allannguutissatullu siunnersuutip nunaqarfiit ilaannit apeqquserneqarnera, Ilinniartitaanermut naalakkersuisup Palle Christiansenip paasisinnaalluarpaa:

- Siunissami allannguisoqarnissaa nunaqarfiit ilaanni atuarfinnit ernummatigineqarnera paasisinnaavara. Ernumasoqarneranilli ilisimatinneqaraangatta illoqarfinni atuarfiit nunaqarfinni atuarfinnik akisussaaffeqalersussat ilisimatittarpavut nunaqarfinni pissutsit atuuttut ilaatigut allarluinnaasinnaasut, Ilinniartitaanermut naalakkersuisoq Palle Christiansen oqarpoq.

Barbara Strøm-Baris, Nuugaatsiap atuarfiani ukiuni arfineq-pingasuni pisortaareerpoq, atuarfinnilu perorsaanermik aaqqissuussaanikkullu akisussaaffimmik nunaqarfinniit illoqarfinnut nuutsisoqarpat sulinermut tamanna ajoqutaasinnaasoq, taassuma ernummatigaa:

- Inuit nammineerusussusiat arlaatigut peerneqarsinnaassaaq, sulerusussuseqarnermullu aamma ajoqutaasinnaalluni, Barbara Strøm-Baris oqarpoq.

Palle Christiansenilli tamanna ima akissuteqarfigaa:

- Atuarfiit nunaqarfinniittut ingerlalluarnissaat suli akisussaaffigissavaat, aqutsinermilli akisussaaffik illoqarfinnut nuunneqassaaq, piffissarlu annertunerusoq meeqqat atuartinneqarnissaannut taamaalillutik atorsinnaalissallugu.

- Isumaqarluinnarpungalu sulerusussuseq taamaalinikkut annerulissasoq, Ilinniartitaanermut naalakkersuisoq Palle Christiansen oqarpoq.

Nunaqarfiit ilaanni atuarfiit ajornartorsiuteqarfiusut taamaallaat taamatut aaqqissuussiffigineqarnissaat Barbara Strøm-Barisip orniginartinneruaa, atuarfiit ajornartorsiorteqanngitsutut nalilerneqarsinnaasut ullumikkutut ingerlaannarsinnaanissaat kissaatigalugu.

Palle Christiansenillu tamanna isumaqataaffigaa:

- Taamatut aaqqissuussineq nunaqarfinnut tamanut atuuttariaqanngilaq. Nunaqarfinni ataasiakkaani kommuninilu oqartussat namminneerlutik aalajangiisinnaanissaat kissaatigaara, Ilinniartitaanermut naalakkersuisoq Palle Christiansen oqarpoq.

Meeqqat atuarfiat pillugu inatsisip allanngortinneqarnissaanik siunnersuut, Inatsisartut ukiaru ataatsimiinneranni oqaluuserineqassaaq.