Nunaqarfimmi atuarfittaaq oquppoq
- Taama sanaartukkami nutaatigisumi oqoqalereersinnaanera Upernaviup kommunerisimasaata sanaartornermi naammanngitsumik nakkutilliisimaneranik peqquteqarpoq, Naalakkersuisut aningaasaqarnermut ataatsimiititaliamut qinnuteqaamminni taama allapput.
Kullorsuup Atuarfissua aggustimi 2009-mi atoqqaartinneqartoq ullumikkut 1. klassemiit 10. klassemut 120-t missaanniittunik atuartuuteqarpoq. Atuarfiup sananeqarnerani aningaasaliissutit 38,8 millionit koruuniusimapput. Taakku saniatigut oqummik akiuiniarnermut 1,5 millioni koruunit tunniunneqassasut aningaasaqarnermut ataatsimiititaliap akuersissutigaa.
Sanaartugassanut Iluarsagassanullu Aningaasaateqarfimmi sanaartukkat naammassereernikut pillugit aningaasaateqarfianit illikartitsinikkut aningaasat atorneqassapput.
Sanaartugassanut Iluarsagassanullu Aningaasaateqarfimmit aningaasanik atorneqanngitsoortunik Naalakkersuisut aatsaat atuilinngillat. Naalakkersuisut aningaasanik atorneqanngitsoortunik taama atuisarnerat pillugu aningaasaqarnermut ataatsimiititaliaq siorna kingullermik uparuaavoq.
- Ataatsimiititaliaq isumaqarpoq Sanaartugassanut Iluarsagassanullu Aningaasaateqarfimmit aningaasanik atorneqanngitsoortunit 13 millionit koruuninit aalliinnarsinnaaneq ajornanngippallaartoq. Taamaattumik Sanaartugassanut Iluarsagassanullu Aningaasaateqarfiup sanaartugassanut aningaasat atugassai qassit siunertaminnut atorneqartarnersut ataatsimiititaliap misissorluaqqissaartariaqarpaa, aningaasaqarnermut ataatsimiititaliaq ilaatigut taama allappoq.