Nunaqarfiit tv-kkut isiginnaagassarpassuaqarumapput
Nunatsinni paraboli iluaqutigalugu TV-kkut toqqaannartumik nunanit allaneersunik isiginnaarumasut amerliartupiloorput.
TV-kkut kanalinik nunanit allaneersunik siammarterisup suliffeqarfiup namminersortup Greensatip neqeroorutai nunatsinni nunaqarfinni 20-ini maanna pissarsiarineqarsimalersut, Greensatip piginnittua Edward Bach oqaluttuarpoq.
Kanalinik neqeroorutertik naatsorsuutiginngisaminnik assut iluatsilluartoq sulilu inniminniisut imaaginnavimmata angummappiarsinnaanatik ikkuissuillutik, Edward Bach unniorsiorpoq.
TV-kanalit nunanit allaneersut Danmarkimeersullu 30-iniit 48-it tikillugit amerlatigisut Greensatimit pissarsiarineqarsinaapput, ilaatigut isiginnaarneqarsinnaallutik DR1, DR2, Discovery, kanalit pinngortitamik uumasunillu soqutigisallit kanalillu allat soorlu Canal Digital, Viasatilu filminik aallakaatitsinerusut.
Greensatip kanalinik nassitsissutaa akunnernik sisamanik kinguartitaanngimmat kanalit ilaanni filmit atoqatigiinnermut tunngasut Danmarkimi unnuaasoq, nunatsinni unnukkut neriuffiup nalaani allakaatinneqartarput, meeqqallu tamakkuninnga takusaqannginnissaat pillugu kanalit parnaarneqarsinnaasut, Edward Bach erseqqissaavoq.
