Qulaarpaa Nunaqarfiit tusagassiuutinit malinnaavigineqanngillat

Aviiseqartinnagu internetteqaranilu susoqarneranik malinnaaniarneq ajornakusoortoq, Elias Larsen oqarpoq, taassumalu aamma nunaqarfinmmi Nuussuup sammineqarnerunissaa amigaatigaa.
februaarip 24-at 2015 17:55

Nunaqarfimmi najugaqartuulluni Nunatta sinnerani susoqartarnera malunnaaffigiuminaappoq. Upernaviup Avannaani Nuussuarmiu Elias Larsen taama oqarpoq.

- Tamaani avannaaniilluni tusagassiutitigut peqataaniarneq ilungersunartorujuuvoq, aviisinilluunnit tamaannga tikittoqarneq ajorami. Nammineq qarasaasiaqanngikkaanni internetteqanngikkaanni naamik, Elias Larsen oqarpoq.

Taanna naapertorlugu tusagassiuutinit peqataatinneqannginneq ajornartorsiutaavoq.

Tusarneqanngitsutut misigisimavoq

Tusagassiutinimmi tusarneqanngitsutut misigisimavoq.

- Annerusumik peqataatinneqanngilagut. Tusagassiutit eqqarsaatigisagaanni.

Tusagassiuutinillu malinnaaffigineqanngitsutut misigisimasarneq, Transparency Greenlandip siulitaasua, Anita Hoffer, naapertorlugu tamat oqartussaaqataaneranni ajornartorsiutaavoq.

Aamma atuaruk Nunaqarfimmiut tusagassiuutinit sammineqarnerusariaqartut

Anita Hofferimi oqarpoq, nunaqarfimmiut tusaaneqartutut misiginissaat pingaartorujussuusoq.

Tamat oqartussaaqataaneranni ajornartorsiutaavoq

- Taamaalisoqanngippat pissutsit ajornerulissapput, soqutiginninnerlu annikinneruleriartuinnassalluni. Ingammik nunaqarfinni, tusaaniarneqanngitsutut misigigunik.

- Taava aamma qaavatigut tusagassiuutit saqqummiussaat soqutiginngikkunikkit, taava qaammarsagaasimassanngillat. Taamaassimappallu, taava Transparency Greenlandimi naliliisarnitsitut tamanna tamat oqartussaaqataaneranni ajornartorsiutaassaaq, Anita Hoffer oqarpoq.

Inuiaqataagatta

Elias Larsen aamma taamatut naliliivoq.

- Soorunami aamma inuiaqataagatta pisunut malinnaarusulluta malinnaatitserusullutalu, taamaattumik tusagassiuutit pisariaqartikkaluarpagut.