Nunaqarfiit pitsaanerusumik kiffartuunneqarnissaat ujartorneqarpoq

- Kiffartuussinissamut isumaqatigiissutit Naalakkersuisunit peerneqassappata nunaqarfinnut pitsaasumik siunissami kiffartuussisoqarsinnaanavianngilaq. KNI-ip pisortaanera Gerhardt Petersen ippassaq ataatsimeersuareernerup kingorna oqarpoq.

Naalakkersuisoq Johan Lund Olsen tamanna pillugu akissuteqarluni oqarpoq, ingerlatsinermut aningaasartuutit qanoq annikillisinneqarsinnaanersut pillugit ingerlatseqatigiiffik saqqummiussaqartariaqassasoq.

KNI-mut ukioq 2007-p tungaanut ukiumut tapiissutissat 50 million koruuniupput, taakku atorlugit nunaqarfinnut isorliunerusunullu nioqqutissanik pilersuineq qulakkeerneqartarpoq. Isumaqatigiissut tamatuma kingornatigut isumaqatigiinniutigineqaqqissaaq.

- Tapiissutaasartulli ikinnerusinnaanngillat, ikilisaasoqassappallu malunniutissaaq. Gerhardt Petersen erseqqissaavoq, nangillunilu:

- Tapiissutaasartut ukiuni kingullerni sisamani ukiumut 10 million koruuninik ikilisinneqartarsimapput, ikilisinneqaqqissinnaanngillat. Ikilisinneqaqqissappata kiffartuussineq ajornerulissaaq. Gerhardt Petersen oqarpoq.