Nunaqarfiit pajunneqarsinnaajunnarput

RAL´ip assartuussua Arina Arctica Sisimiut avannaanni kitaata sikuani kiggigussaaqqavoq.
Allattoq Ludvig Siegstad
marsip 05-at 2012 13:56

Sineriak Paamiunit Sisimiunut assartuutinik nunap iluatigut angallavigineqarnerpaaffiusartoq sikooqimmat maannakkut angallaviujunnaarpoq, umiarsuit nunaqarfinnut assartuussutaasartut avataatigoortariaqarlutik, taama Royal Arctic Line ilisimatitsivoq.

Royal Arctic Line aamma ilisimatitsivoq Arina Artica avannaanut ingerlaqqissinnaajunnaartoq, Aasiannut Ilulissanullu tikinnissaraluani taamaatittariaqarlugit. Umiarsuaq silagisseriarpat Nuummut Sisimiutigoorluni kujammukassaaq.

Nunaqarfinnut assartuutit Angaju Ittuk aamma Johanne Kristine Nuummi uninngapput angallavissaat sikooqimmata. RAL aamma ilisimatitsivoq Atammiup, Napasup, Kangaamiut, Itillip Sarfannguillu eqqaat sikooqisut.

Kujataani nunaqarfinnut assartuut Aqqaluk Ittuk Qaqortumi aamma maannakkut uninngaannarpoq, Narsatigoorluni ornitassaraluata ilaai tassaasut Narsarsuaq aamma Qassiarsuk sikooqimmata tikisinnaanagit, Royal Arctic Line tusagassiutinut nalunaaruteqarluni ilaatigut taama ilisimatitsivoq.