Nunaqarfiit oqartussaaqataanerunissaat IA-p tapersersorpaa

Inuit Ataqatigiit partiiat ataatsimeersuarnermi 16-inik peqataatitaqarpoq, taakkua nunaqarfinni aqutsisunut, kommunalbestyrelsenut inatsisartunullu ilaasortaallutik.

Nunaqarfinni aqutsisut oqartussaaqataanerunissamik ujartuinerat, IA-p ataatsimeersuarnermi peqataatitaannit maluginiarneqarpoq.

Isuma tamanna IA-mit isumaqatigineqarpoq, nunaqarfinni innuttaasut nammineerlutik nunaqarfiit ineriartornissaannut siuttuusussaammata tamannalu pingaaruteqartuusoq IA isumaqarluni.

Nunaqarfinni innuttaasut nunaqarfiup ineriartortinneqarnissaannut piumassuseqartut tapersersorluarneqarnissaannik, IA suliniuteqarniarpoq, ataatsimiissuarnermi peqataasut tusagassiuutinut nalunaaruteqarlutik taama allapput.

Nunatsinni illoqarfiit mikinerusut sammineqanngippallaarnerat IA-mit aamma ujartorneqarpoq.

- Kommunit kattunnerisa kingorna illoqarfiit minnerit peqataatinneqarnerat oqartussaaqataanerallu annikinnerulersimavoq, tamannalu sammissalugu pingaaruteqarpoq, taamaattumik tullissaani ataatsimeersuartoqalerpat kaammattuutigissavarput, illoqarfiit minnerit immikkut aamma sammineqassasut, IA allappoq.

Ataatsimeersuartoqarnerani arnat ikittuinnaat peqataatinneqarnerat ajuusaarutigineqarpoq.

- Naligiinnerusumik ineriartortitsissagutta arnat angutillu peqataanerat oqimaaqatigiinnerusariaqarpoq, kaammattuutigissavarpullu nunaqarfinni aqutsinikkut tamanna anguniarneqassasoq, Inoqarfiit mikinerusut pillugit ataatsimeersuarnermi, Inuit Ataqatigiit peqataatitaat tusagassiuutinut nalunaaruteqarlutik taama allapput.