Nunaqarfiit oqartussaanerulernissaat ujartorpaa

Nunaqarfinni aqutsisut pisinnaatitaaffiisa annertusarneqarnissaat siunertaralugu kommunit tamarmik aningaasanik minnerpaaffilikkanik immikkoortitsisarnissaat pillugu, Inuit Ataqatigiinneersoq Ane Hansen Inatsisartunut siunnersuuteqarpoq.

- Ukiut qulit matuma siornatigut kommunit piginnaatitaalerput, nunaqarfinni aqutsisunik piginnaatitaaffiliinissaminnut. Maannamulli suli annerusumik kinguneqartinneqarsimanngilaq, illoqarfiit ikittuinnaat taamaaliorsimammata. Tamannalu nunaqarfimmiut ataatsimeeqatigiittarnerini assigiinngitsoqarnera ulloq manna tikillugu naammagittaalliutigisarpaat. Ane Hansen oqarpoq.

- Nunaqarfiit ilaat annertunerujussuarmik aningaasaliiffigineqarnermikkut piginnaatitaaffeqarluartarput, allalli illoqarfinnit aqunneqavissortarlutik. Nunaqarfiit nammineersinnaanerannut tamanna aamma killiliisarpoq. Ane Hansen oqarpoq.

Naalakkersuisut ilaatigut aamma erseqqissaapput, nunaqarfiit oqartussaanerannut tunngasut oqallisiginissaat kommunini aaqqissuussaanermut ataatsimiititaliap akisussaaffigigai, taamaattumillu siunnersuut taanna taakku oqallisigisariaqaraluaraat. Tamannali siunnersuuteqartup naammaginngilaa.

- Massakkut utaqqinani sulilluni aallartereertoqarsinnaagaluarpoq. Ane Hansen oqarpoq.

Siunnersuut taamaatsiinnarlugu Inatsisartuni aappassaaneerlugu oqaluuserineqassaaq.