Nunaqarfiit misissuiffigilerpaat
Suliniummi anguniarneqarpoq sumiiffinni pineqartuni tulluarsakkanik innuttaasullu peqataaffigisaanik, sumiiffiit atugassarititallu assigiinngissutaat naapertorlugit, ineriartortitsinissaq.
Kulturikkut Inuiaqatigiilerinermilu cand.mag. Steen Jeppson aamma Isumaginninnermi Siunnersorti, Paarnannguaq Andersen Uummannap eqqaani nunaqarfimmut Ikerasammut maanna ingerlaarput, tassani innuttaasunik isumasioqatigiissitsissallutik.
- Qularnanngilaq nunaqarfimmiut assigiinngissutsikkut piginnaaneqassaqisut, tamakkulu pinngitsoorata isiginiartariaqarpavut, Steen Jeppson oqarpoq.
Ulluni aggersuni 14-ini nunaqarfinni Ikerasammi, Uummannap eqqaaniittumi aamma Akunnaami, Aasiaat eqqaaniittumi, nunaqarfimmiut periarfissaat ujartorniarneqarput.
- Maanna piffissanngorsimavoq nunaqarfiit periarfissaat assiginngitsut misissornissaannut. Tamannalu pissaaq nunaqarfiit innuttaasa isumasiornerisigut, taakkulu isummersuutaat aallaavigalugit nunarfiup ineriartortinneqarnissaa aallartillugu, Steen Jeppson oqarpoq.
Nunaqarfiup siumukartinnissaanut nukiit nunaqarfimmiut namminneq pigisaat aallaavigalugit sulisariaqartoq, Isumaginninnermut Siunnersortsip Paarnannguaq Andersenip anguniarpaa:
- Iliuuseqarusukkaanni aamma ikorfartoqatigiikkaanni perusutaq anguneqarsinnaasoq takutikkusuppara, Paarnannguaq Andersen oqarpoq.
1950-kkunni aamma 60-ikkunni nunaqarfiit inuerusagaanerat uteqqissanngikkaanni pisariaqarpoq nunaqarfimmiut pigiliussaat, tassa kulturikkut atugarilersimasaat, paasilluassallugit:
- Taamani nunaqarfimmiut nussortinneqarmata aningaasarsiorneq aallaavigineqarpoq. Maannali anguniarparpoq innuttaasut pinginnaasaat aamma anguniagaat paasiniassallugit. Taakku misilittagaat ilanngunneqarpata taamani pisimasoq uteqqissanngilarput, Steen Jeppson oqarpoq.
Nunaqarfiit minnerusut ataatsimiitinneqarnissaat maanna misissorneqarpoq, naatsorsuutigineqarluni 2011-p aallartinnerani tamanna pisinnaassasoq, Kangaatsiap kujataaniittumi Ikerasaarsummi.
