Nunaqarfiit kigutit nakorsaannit tikinneqarnerusalissanngillat
Juliane Henningsenip Inuit Ataqatigiinneersup tamanna paaserusullugu peqqissutsimut naalakkersuisumut juulli sioqqutilaarlugu allakkatigut apeqqutigaa.
Kigutit nakorsaqarnerup qanoq inissisimanerata saniatigut isorliunerusuni kigutilerisarnerup pitsanngorarneqarnissaanut Steen Lynge sunik pilersaaruteqarnersoq Henningsenip aamma paaserusuppaa
Tassungalu Steen Lynge Atassummeersoq akivoq, kigutit nakorsaannik Nunatsinni siunissami angalatitsinerusarnissaq neriuutigalugu, tamannali maannakkutut pilersaarutigineqanngitsoq.
- Illoqarfinni innuttaasunik sullissineq annikillisinngikkaluarlugu nunaqarfinnukartitsisarnerup annertusarneqarnissaanut qanoq iliuuseqartoqarsinnaanersoq Naalakkersuisut isumaliutigigaat, Steen Lynge allappoq.
Isorliunerusunit kigutit nakorsaannut nakorsiarniartut angalanerannik aningaasalersuinissaq pilersaarutigineqanngilaq. Inatsimmi atuuttumi allassimavoq immikkut ittumik pilertortumik suliaritinniartut kisiisa kigutit nakorsaannut suliaritinniarlutik angalanerisa aningaasartuutaat nunatta karsianit matussuserneqarsinnaasut.
Steen Lyngeli aamma allappoq nunaqarfiit tamarmik, Napasoq, Isortoq Kapisillillu minillugit kigutit nakorsaannit ukioq manna tikinneqartussaasut. Nunatsinnilu kigutit nakorsaannik tikisitsilluni sulisoqarnissamik ukiuni makkunani ajornartorsiutigineqanngimmat, naalakkersuisup neriuutigaa kigutit nakorsaat aalajangersimasumik atorfillit amerlisissinnaassallugit.
