Nunaqarfiit ivigaasaaqqanik qallikkanik arsaaffittaalersut

Nunaqarfiit Ikerasak aamma Saattut arsaannermut siunissamik periarfissagissaarfiunerulissapput.

Nunaqarfiimmi taakku Uummannap sulluaniittut aappaagu ivigaasaaqqaanik qallikkanik arsaaffittaassaapput. Avannaata Kommuneani kommunalbestyrelsemut ilaasortap Jens Kristian Therkildsenip Siumumeersup siunnersuuteqarneratigut suliaq aallartinneqalerpoq.

- Siunnersuut kommunalbestyrelsemit taperserneqarpoq periarfissallu maanna misissorneqalerlutik. Misissortussaavarput aningaasaliissutaasut suliassamut naammakkumaarnersoq. Tamanna aatsaat takusinnaalissavarput arsaaffiliorfissatut piukkunneqartuni nunagissaanissaq pisariaqassanersoq paasinarseriarpat, Avannaata Kommuneani borgmesteri Palle Jerimiassen KNR-mut oqarpoq.

Ivigaasaaqqanik qallikkamik ukiormanna Ilulissani arsaaffittaarpoq. Upernavimmi arsaaffiliaq siorna kinguaattoorput atortussat nassiunnerat kipusoormat taamalu ukiormanna aatsaat naammassineqartussanngorluni. Maannalu tassa Ikerasak aamma Saattut ivigaasaaqqanik qallikkanik arsaaffittaartussanngorput.

- Arsaaffiit qanoq angissuseqassanersut maannakkut nalunarallarpoq. Tassani apeqqutaalluinnarput sanaartorfiginiakkani qanoq inissaqartiginersoq. Soorunami unammiffiusinnaasut minnerpaaffissaata angunissaa siunniuteqqavarput, Palle Jerimiassen oqarpoq.

Nunap immikkoortuani unammersuarnerit

Arsaaffittaarneq nunaqarfinni pineqartuni eqiiallaataassasoq ilimagineqarpoq.

- Uummannap sulluamiut ukiumoortumik unammersuartarput aammalu Upernaviup eqqaamiut aamma unammersuartarlutik. Qularinngilara arsaaffiit siunissami atorneqarluartarumaartut, Palle Jerimiassen oqarpoq.

Upernaviup eqqaani Aappilattumi timersortarfeeraliorsinnaaneq Avannaata Kommuneanit maanna aamma misissorneqarpoq.

Avannaata Kommunea undersøger også anlæggelse en minihal i Aappilattoq ved Upernavik.

- Timersortarfeeraliarineqarsinnaasunik illussanik titartaasartut suliaqartinneqarput aamma Aappilattup saniatigut nunaqarfinni allani sananeqarsinnaanissaat periarfissaaniassammat. Eqqarsaatinut aamma ilaavoq timersortarfeeqqat illutaasa siunertanut allanut aamma atorneqarsinnaanissaat. Tamakku kommunalbestyrelsemut saqqummiunneqareerpata aningaasalersornissaanut periarfissat misissorneqassapput, Palle Jerimiassen oqarpoq.

Ilulissat eqqaanni Oqaatsormiut Ilimanarmiullu aamma ivigaasaaqqanik qallikkanik arsaaffeeraqalernissamik kisssaateqarlutik saqqummiussereerput.