Nunaqarfiit isorliunerusullu eqqugaanerpaasarput
Nunaqarfinni ilinniartitsisussaaleqineq pissutaalluni meeqqat nunaqarfinneersut illoqarfimmut atuariartoraangamik atuartinneqarnerunissaat pisariaqartarpoq.
Nuummi ilinniartitsisut nutaat 19-it ullumi allagartartaarput, ilinniartitsisussaaleqinerlu eqqartorneqartillugu nunaqarfinni isorliunerusunilu ilinniartitsisussaaleqineq malunnarnerusarpoq.
Qaanaami atuarfiup pisortaa Aksel Lund Olsen oqarpoq, meeqqat nunaqarfinneersut illoqarfimmut atuariartoraangamik atuartinneqarnerunissaat pisariaqartartoq.
-Maluginerpaarpaajusarparput nunaqarfinniit illoqarfinnut angajullernut atuariartortut atuagarsornikkut angummatsinniarneri misilitsinnissaata tungaannut ilinniartitsisut piffissarujussuaq annertooq atortarpaat, Aksel Lund Olsen.
Ilinniartitsisunut isumaqatigiissut nutaaq malillugu Savissivimmi Siorapalummilu tamarmik ataatsimik ilinniarsimasunik ilinniartitsisoqaraluartut, Savissivimmi ilinniartitsisunik pingasunik ilinniarsimasunik amigaateqarput, Siorapalummilu sisamat. Inissaaleqinerlu peqqutaaqataasartoq Aksel Lund Olsen oqarpoq, nunaqarfinnut ilinniartitsisunut inissaq ataasiinnaasarmat.
-Neriuutitta ilagilluinnarpaat nunaqarfinni anginerusuni ilinniartitsisut inissiaat amerlanerusunik sanaartortoqarsinnaanera, Aksel Lund Olsen oqarpoq.
Ilinniartitsisut kattuffianni siulittaasoq Sivso Dorph oqarpoq ilinniartitsisussaaleqineq qaangerniarlugu inuusuttunut pilerisaarineq pisariaqartoq.
-Ilinniartitsisutut inuuniuteqarnerup inuusuttunut pilerinartunngortinnissaa saqqummiuttassallugulu pingaaruteqarluinnarpoq, Sivso Dorph oqarpoq.
Tassani aamma eqqarsaatigineqarlutik akissarsiat atorfinitsitaanissamut atugassarititaasut.
IMAK-iminngaaniillu inuiaqatigiinni saqqumilaarnissaq aqqutissaasutut isumaqarfigineqarpoq, oqallisigitinneqarnissaalu ilinniartitsisutut atorfiup qanoq nuannertiginera. Taassumalu saniatigut isumaqatiginninniarnerni sapinngisamik angusaq pitsaanerpaaq anguniarsarissallugu.
Nunarput tamakkerlugu ilinniartitsitsisutut atorfiit 1340-pput pisariaqartinneqarput, 445-llu amigaatigineqarlutik.
