Nunaqarfiit inuussutissarsiutigineqarsinnaapput

Nunaqarfiit nanertuutaanatik iluanaarutinngortinneqarsinnaapput soorlu Norgemi Islandimilu taamaattut. Uagullu nunatsinniit tamanna ilinniutigisinnaavarput, Labradorimi isumasioqatigiinnissamik aaqqissueqataasoq kujataani takornariartitsinermi pisortaq Kenneth Høegh oqarpoq.

Atlantikup avannaanut nunat sineriallit arfiniliusut pingasunngorpat aallartittussami Labradorimi New Foundlandtimiittumi isumasioqatigiissapput. Nunatsinniillu inuit arfineq-pingasut peqataassapput, taakku ilagaat nunalerinermi siunnersuisoqarfimmi pisortaq Kenneth Høegh. Taanna aamma NORA-mi ilaasortaavoq, NORA-lu tassaavoq, atlantikup avannaaniittuni nunani suliniutissanik aningaasanik tapiissuteqartartoq. Kenneth Høegh aamma nunatsinni takornariaqarnermi inuussutissarsiornermilu siunnersuisoqatigiit siulersuisuinut ilaasortaavoq.

- Atlantikup avannaani nunat arlalitsigut assigeequteqarput, tamarmik imaq atorluarlugu inuupput, illoqarfippassuaqarlutillu nunaqarfippassuaqarput ilaatigut aamma ingerlalluanngitsunik, Kenneth Høegh oqarpoq.

- Soorlu Norgep avannaani Islandimilu nunaqarfiit ajorpasinngitsumik ingerlapput. Tamannalu soqutigilluarparput aperaluta sooruna taakkunani aningaasatigut ajunngitsumik ingerlasoqartoq?

- Kulturi suaniittarpa? Illoqarfissuarniittarpa? Naamik. Nunaqarfeeqqaniittarpoq. Taamaammat takornariaqarnermut nunaqarfiit iluaqutaasinnaapput, oqarpoq.

Kenneth Høeghip Norge assersuutigalugu oqarpoq, Norgemi nunaqarfiit kulturikkut iluatinnaataat pingaartinneqarluinnartuusut.

- Norgemi nunaqarfimmiut nunaateqartuupput aalisartuullutillu, tamannalu kulturimut attuumassuteqarluinnarmat tapersersorneqarluarpoq, Kenneth Høegh oqarpoq.

Taanna qalleqqissaalluni oqarpoq, nunaqarfiit takornariaqarnikkut iluaqutaalluartuusut.

Kenneth Høegh taama oqarpoq. Taanna aamma erseqqissaavoq, isumasioqatigiinnermi nunani avannarlerni suliffissaaleqineq aamma eqqartorneqassasoq.

Isumasioqatigiinneq tallimanngorpat tungaanut ingerlanneqassaaq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat