Nunaqarfiit inuerukkiartornissaat annilaanngatigineqarpoq
Inuit Ataqatigiit siulersuisuunerisa nalunaarutaat ippassaq immikkoortortaqarfinniit oqaluuserineqarmat akit assigiikunnaarnerisa malitsigisassaat nunaqarfiinneersunit uparuartorneqangaatsiarpoq.
Soorlu Akunnaami nunaqarfiup aqutsisuini siulittaasoq IA-llu siulittaasussaattut unammillertussatut eqqarsaateqartoq Enok Sandgreen oqarpoq, namminersulernissaq piinnarlugu innuttaasut artukkerneqassanngitsut. Nangilluni oqarpoq nunaqarfiit inuerukkiartuinnarnissaat annilaanngatigalugu, nunaqarfinni suliffissaaleqisut amerlaqimmata.
Nunaqarfinni tunisassiaasinnaasut soorlu aalisakkat ineriivillugit tunisassiarineqalertariaqartut Enok Sandgreen aamma oqarpoq.
Tasiusami Nanortallip pigisaaneersoq Ingemann Dorph, nunaqarfiit inuerukkiartuinnarnissaat aamma annilaangassutigaa.
-Nunaqarfinni tunisassiorfiit matoorarput, isorliunerusunilu akit qaffammata akilersinnaangitsumik ingerlanissaat annilaangassutigineqarpoq, Ingemann Dorph oqarpoq.
Ullumi qulingiluaniit kommunimut nunaqarfiullu aqutsisuinut qinersinissaq IA-mi ataatsimeersuaqataasuniit oqaluuserineqartussaavoq, aammalu immikkoortortaqarfinniit oqaluuserisassatut siunnersuutit oqaluuserineqassallutik.
