Nunaqarfiit inoqanngitsut politiit nakkutigigaat
Nugaatsiami arfininngormat tassaarsuaqarneranut atatillugu annaassiniarnermi politiit sulinertik unitsissimalerpaat.
Ajunaarnersuaqarfiusumili Kalaallit Nunaanni politiit suli sulipput:
- Nunaqarfiit inoqanngitsut nakkutigaagut, qimmillu nunaqarfinniittut aamma isumagaagut. Qimmit aaneqarsinnaanissaat pisinnaasarput naapertorlugu iliuuseqassaagut silali peqqutaalluni maanna taamaliorsinnaanata, Nuummi kommandocentralimi politiassistenti Henrik Duus taama oqarpoq.
Nakkutiginninnermi umiarsuaq qulimiguulillu atorneqartut Henrik Duus oqarpoq.
Innuttaasut qaqugu uternissaat Namminersorlutik Oqartussat aalajangissavaat
Innuttaasulli qimagussuunneqarsimasut qanoq pineqassanersut oqaatigisinnaanngilaa, Namminersorlutilli Oqartussanut innersuussilluni.
- Nunaqarfimmi innuttaasut qaqugu angerlarsinnaanissaat pillugu Namminersorlutik Oqartussanut innersuuppassi, taakkumi aalajangiisussaapput, Nuummi kommandocentralimi politiassistenti Henrik Duus taama oqarpoq.
Inuuttaasut nunaqarfimminnut qaqugu utersinnaanissaat imaluunniit qaqqaq kaanngarsimasoq qanoq pineqassanersoq Namminersorlutik Oqartussanit ullumi oqaaseqatitsiniaraluaratta iluatsinngilarput.
Taanna qaqqaq Karrat Kangerluani tassaarsuaqartitseqqissinnaasoq GEUS-imit ilimagineqarpoq.
Upalungaarsimanissamut ikiuunnermi ulappunneq pissutigalugu GEUS tusagassiuutinik maannakkuugallartoq salliutitsisinnaanatik nalunaaruteqarput.
