Birger PoppelAssi: KNR

Ilisimatooq: Nunaqarfiit ilaasa salliutinneqartarneri nutaarsiassaanngilaq

Najugaqarfiit ilaasa allanit salliutinneqarnerusarnerat nutaarsiassaanngilaq. Inuiaqatigiit pillugit ilisimatusarfimmi ilisimatooq, Birger Poppel taama oqarpoq.

Nunalu tamakkerlugu pilersaarusiaq salliutitassanik tulleriiaarinissamut atortussaavoq. Tamannali arlalinnit, ilaatigut Birger Poppelimit, isornartorsiorneqarpoq.

Taamaattoq najugaqarfiit ilaat salliunneqarnerusartut maana tassa oqarpoq.

Tunitsiviliortoqaraangammi inissianilluunniit sanaartornissamut tapersiisoqaraangat salliussisoqartartoq ilisimatooq oqarpoq.

- Nunaqarfiit sorliit salliutinneqassanersut oqaatiginngikkaluarlugu, nunaqarfinnut taama politikkeqartoqareerpoq, Birger Poppel oqarpoq.

Aamma atuaruk Nuttarnerit politikikkut aalajangiisarnermit pissuteqarput

Nunaqarfiit ilaasa inuerukkiartornerisa sammineqarnissaat pingaaruteqartoq, arlalinnit ilaatigullu Siumeersunit nuiamasunit ukiuni kingullerni oqaatigineqartarpoq.

- Immitsinnut aperisariaqarpugut: siunissaq ungasinnerusoq isigalugu inuiaqatigiinni nunaqarfiit inukitsunnguit aammalu nunaqarfiit inukilliartuinnartut qanoq isilluta qulakkeersinnaanerlugu, Naalakkersuisoq Vittus Qujaukitsoq nunaqarfiit pillugit 2013-imi isumasioqatigiittoqarnerani taama oqarpoq, ilanngullugulu oqarluni najugaqarfinnut ineriartornissamik periarfissaqarfiusunut aallarniiniartunillu innuttaasulinnut ineriartornitsitsinissamut pilersaarusiortoqartartoq.

Nunali tamakkerlugu pilersaarusiami innersuussutigineqartut sivisuumik politikkerineqaraluartut, pisortatigoortumik allagartani saqqummiunneqarnerat nutaajusoq, Birger Poppel oqarpoq.

- Aalajangerneqartartut inunnut kinguneqartarnerisa takuneqarsinnaanngoriasaarnera politikerinit qisuariarfigineqarsoraara, Birger Poppel oqarpoq.

Aamma atuaruk Pilersaarusiaq pingaarnersiuinermi tunngaviusinnaanngitsoq

Nunalu tamakkerlugu pilersaarusiami nunaqarfiit inuerukkiartortut qanoq nakkutigisaasumik matujartortinneqarsinnaanerannik misissuisussamik ataatsimiititaliamik pilersitinissamik innersuussut ingammik oqallitsitsivoq.

Innersuussut taanna Inuit Ataqatigiinnit, Siumumit Partii Naleqqamiillu politikerinit isornartorsiorneqartupilussuuvoq, Naalakkersuisullu nunaqarfinnik pinngitsaaliillutik matusiniartuunerarneqarlutik.

2015-imulli nuna tamakkerlugu pilersaarusiap Inatsisartunit oqaluuserineqarmat Siumumeersoq Anders Olsen ima oqarpoq.

- Siumumiit siammasissumik najugaqariaaseqarnitta tassuunakkut isumaliutigeqqittariaqarneranik oqariartuuteqarnissamik pisussaaffilerpaatigut, tassami ineriartornerup saakkiartorfii ukiuni makkunani takusinnaalersimasagut ilaatigut ernumanartoqarneranik tikkuussimmata.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl