Nunaqarfiit ilaasa matuneqarnissaat Palle Christiansenip kissaatigaa
Nunaqarfiit 100-t ataallugit innuttaqartut matuneqarnissaat, Demokraatit sinnerlugit inatsisartunut ilaasortap Palle Christiansenip siunnersuutigaa. Imminut akilersinnaasumik nunassittoqartarnissaa taassuma kissaatigaa.
Allattoq Mads Lynge
- Nunassittarnerup pissusaa Kalaallit Nunaanni ajornartorsiutaanerpaavoq. Nunaqarfinnik sullissineq maannakkutut ittoq akissaqartinngilarput, taamaammat nunaqarfiit ikilisarneqartariaqarput, Palle Christiansen nittartakkamini allappoq.
Kalaallit Nunaanni aningaasaqarniarneq ullumikkutut iinnassappat sunut tamanut akissaqanngitsugut, Palle Christiansenip oqaatigaa:
- Nunaqarfiit 100-t ataallugit innuttallit matuneqarnissaat aqqutaasinnaavoq. Inuillu taakku illoqarfinni allani initaartinneqarlutillu suliffittaartinneqarnissaat suliniutigineqassaaq, Palle Christiansen allappoq.