Nunaqarfiit aamma aningaaanik pisinnaapput
Aningaasanut 2010-mi inatsisissamut siunnersuummi nunaqarfinnut avinngarusimanerusunilu augarissaarnerulernissaq qanoq ittoq atuutsinneqassanersoq, Naalakkersuisut eqqarsaatigineraat Aleqa Hammondip apeqqutigaa.
Isumaginninnermut Naalakkersuisoq, Maliina Abelsen, akissummini pingasunik tikkuagaqarpoq, oqarluni illoqarfiit nunaqarfiillu immikkoortinneqarnavianngitsut.
- Siullermik, 25 millionit koruunit meeqqanut inuusuttunullu taamaallaat atorneqassapput. Aappassaanik, siusinaarluni utoqqalinersiat aappaagu juunimiit qaffanneqarnissaannik kissaateqarneq. Kiisalu akileraarutitsinnik akitsuutitsinnillu, isumaginninnikkut ineqarnikkullu tapiissuteqariaatsinik aamma tapiissuteqariaatsit akornanni sunniivigeqatigiittoqartarneranik atugarissaarnerulernissaq pillugu ataatsimiititaliarsuup misissuisitsinerata inernerani allannguutissanik siunnersuusiortoqarneranik kinguneqarnissaa, tassa innuttaasut tamarmik pineqarput, illoqarfimmiikkunik nunaqarfimmiikkunilluunniit, Maliina Abelsen oqarpoq.
Aningaasanulli inatsisissamut siunnersuut Inatsisartuni novembarip aqqarnganni pingajussaaneerneqarluni akuersissutigineqassaaq.