QULAARPAA Nunaqarfiit 18-it inueruteratarsinnaapput
Inuusuttut pingaartumillu arnat illoqarfinnut nuuttarput. Utoqqaat inuusuttullu ilaat allanik periarfissaqanngitsut sumiiffinni kiserngoruttuusarput.
Nunaqarfiit amerligaluttuinnartut siunissaat nalorninarsiartortut, Nunatsinni Aningaasaqarnermut Siunnersuisoqatigiit ukioq manna nalunaarusiaminni erseqqissarpaat.
Najugaqarfiup mianernartutut nalilerneqarnissaanut naammassisassat tallimat, Siunnersuisoqatigiit suliarisimavaat itisilerlugillu. Nunaqarfiillu 18-it mianernartutut naliliinermi tunngaviit sisamat tallimalluunniit naammassisimavaat, nunaqarfiillu mianernarluinnartutut nalilerneqarlutillu.
Naliliinermi tunngaviit tassaapput innuttakinneq, ukiumut inunngortut toqusunit ikinnerunerat, allamut nutsertut amerlanerat, arnartakinneq aamma sumiiffimmi utoqqaat amerlasuut.
Aamma atuaruk Nunaqarfinni kommunefogedeqarniarneq ajornartorsiutaavoq
Najugaqarfiit mianernaatinik arlaqartunik naammassinnittut ukiuni kingullerni amerligaluttuinnarput. Pisussarlu ersarissiartuinnarpoq. Ineriartorneq maannakkutut ingerlaannassappat najugaqarfiit taakku piujuaannarsinnaanngillat.
Najugaqarfiilli minnerit kisimik ilungersunartorsiunngillat. Innuttaasut najugaqarfinnit minnernit najugaqarfinnut annerulaanut nuukkallartarput, kingornalu illoqarfinnut annernut nuuttarlutik. Aammali kalaallit Nunarput qimavillugu nunanut allanut nuunnissamik aalajangertut amerligaluttuinnarput. Nunarput siunissami innuttakilliartuinnassasoq naatsorsuutigineqalereersinnaavoq.
Aamma atuaruk Akunnaami saarulliit tarajortikkat tunisassiarinerat suliffissaqartitsisoq
Qulaarpaa sisamanngorpat KNR-ikkut aallakaatinneqarpat, nunatsinni nuttarneq sammineqassaaq. Unammilligassagut sammissavagut. Aammalu innuttakilliartornerup suna kingunerissaneraa suullu aaqqiissutaassanersut sammineqassapput.
