Nunaqarfigineqartarsimasut sumiiffii nalunaarsorneqassapput

Alcoap aluminiuliornini aallartippagu itsarnitsat tammaannassammata Kalaallit Nunaanni Katersugaasivimmiit itsaq nunaqarfigineqartarsimasut sumiiffii nalunaarsorneqarput.

Aluminiuliorfik nukissiamik pisariaqartitsisupilussuussammat, Alcoa tatsinik Nuup Kangerlussuullu eqqaaniittunik sapusiorniarpoq, ilaatigut Kalaallit Nunaanni tatsit annersaat, Tasersiaq sapusiorneqassalluni.

- Tatsit sapusiorneqarpata ukiut tusindillit ingerlaneranni aavartartut tatsit sinaanni najugarisarsimasaasa sinnikuisa tammannginneranni paasissutissanik katersuiffigerusukkaluarpavut. Taamaammat tatsit sinaat qummut 20-30 meterit angullugit misissuiffigaavut, titartaalluta, takissusaat allattorlutigit assileeqattaarlutalu. Tamaani aasami aavartut najugaqartarsimammata illuisa, toqqit, piliffigisarsimasaasa inaat nassaarisinnaavagut, kiisalu toqusut inaat inussuillu nassaariortorpavut. 1800-kkunni oqaluttuartarsimasut, Aalut Kangermiu Jens Kreutzmannilu Kangaamiuneersoq oqaluttuaasa sumi pisarsimaneri nassaariortorpavut, Katersugaasivimmi pisortap tullia, itsarnisarsiooq, Claus Andreasen oqarpoq.

Paasisat tamakku kingulliarsuit sumut atussanerlugit aalajangissavaat, oqaluttuarisaanitsinnuli tunngasuummata Claus Andreasenip erligigaluarpai.

Tatsit sinaanni nassaatik tammartussanngortut nalunaarusioreerunikkit Katersugaasivimmiit atuagaaraliariniarpaat najugaqarfiusarsimasullu pingaarnerutitatik assaavigisassavaat. Itsarnitsat misissorneri nalunaarsornerilu milliuunerpaalunnik akeqassapput.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat